飯能紅葉。兒童森林公園（姆明公園）

< 東京﹑箱根﹑飯能8天遊 > 

第四天

返到黎東京第一日先去我最鐘意既飯能市，今日飯能咁岩有紅葉祭，相信紅葉一定會好靚好靚

遲左小小出門口，十點先慢慢出發，所以今日時間好緊迫；又路過琴晚食過既松屋，好快食個早餐正式出發


飯能位於埼玉縣，離東京市區有啲距離，係池袋坐西武池袋線去可以直接到算係方便，班次仲好密


見到有準急同急行列車，咁緊係搭急行個部，停少啲站快到好多




寵物小精靈列車！


大約一個鐘車程去到飯能站前一個站「元加治站」落車，呢個只係一個細站，成部車都係得四個乘客係呢道落，個站冷冷清清




車站附近全部都係民居，連便利店都冇，如果唔係為左去公園我諗跟本唔會有遊人黎呢道


環境係唔錯既




前面兩個女仔一齊落車之後同我去同一個方向，我估佢地目的地都係同我一樣，最後真係係公園見到佢地（臨尾佢地行錯路冇上天橋，比我快過佢地到，哈哈）；由元加治站行去公園大約行左二十分鐘，跟住馬路行唔算難搵


進入飯能市，好快就到公園啦


普普通通河邊一個公園都咁靚，公園夠晒大就算好多細路玩都唔會覺得迫




環境咁舒服係樹下野餐就最岩




終於黎到目的地「兒童森林公園」，亦即係好多人叫既「姆明公園」；公園係芬蘭以外第一個得到作者認可既姆明主題公園，相信公園入面一定可以感受到童畫氣息




星期一係唔開放架！公園係動漫「登山少女」其中一個聖地，上次到飯能因為太夜所以黎唔切，今次終於黎到！呢個公園一向都唔多出名，但近半年唔知點解突然多左人介紹呢道，不過始終路程遠唔太方便，相信對遊客吸引力唔係好大，我黎呢道目的係朝聖當然幾遠都唔怕啦


由入口慢慢向公園走去，秋天將公園變得更有色彩，感覺更有童畫世界feel




公園主要由三間小屋組成，當中最引人注目就係圓圓地既「姆明之家」，設計好似故事書入面既小屋一樣，好似蘑菇




正常係可以入去參觀，入面設計又靚又有心思，可惜我咁好彩撞正佢換冷氣所以暫停開放，只可以係外面睇咋


可以係咁靚咁舒服既環境野餐真係好




前間呢間水中小屋都係一樣好受歡迎




兜去後面係小小上斜位，可以由另一邊睇返頭先經過既小屋










左邊仲有一座建築好似係劇場定遊客中心之類，我冇入去唔太肯定，係外面睇都係好靚






銀杏葉落得七七八八，紅葉未完全變紅，一次見到紅綠黃唔同顏色非常靚，再襯返童畫世界背景更加靚




今日時間有限，唔可以留太耐，行完一圈就要離開，今朝早啲出門口就好啦








係公園行一行個人變得特別輕鬆，平時邊會走入公園咁樣慢慢行，唔好話冇可能有個咁靚既公園，係香港搵個靚小小既公園都多人到爆，想靜靜地享受下根本就冇可能




而家先留意到河邊種滿櫻花，春天花開一定超靚




行返去元加治站搭車lu




埼玉縣係好多動漫作品取景地，除左之前講過既「登山少女」之外，另外「未聞花名」﹑「好想大聲說出心底話」我都有睇過，都係好好睇，不過去秩父要更多時間，最重要係因為太耐之前睇已經唔係好記得啲地方，暫時唔會去秩父啦，有更重要既地方要去；如果想睇到喊相信「未聞花名」會幫到大家，係一套非常令人感動既作品


搭一個站到「飯能站」轉車去下一個目的地「東郷公園」


黎到其中一個我最鐘意既地方「飯能市」，暫時唔出去住去左睇紅葉先，今晚先返黎慢慢行