箱根紅葉。大涌谷﹑蘆之湖

< 東京﹑箱根﹑飯能8天遊 >

第一天

十一月中東京市區紅葉理論上未到變紅時間，就算有都唔會係最靚，所以今次首先選擇去距離東京比較遠既箱根，相信山區地方天氣凍紅葉都會早啲變色



今次坐夜機到東京，晚餐唔知仲有冇機會食，先係香港機場食到飽；冇咁多時間排隊就揀左食冇咩人既呢間，呢啲普通茶餐廳野都可以賣到百幾蚊唔怪得佢最少人


出發！


準時到達東京，差唔多半夜時間過關好少人好順利，係機場遊客中心順便買定遲啲用既東京地鐵pass，呢張pass東京市內要去既地方都可以去到，但用起黎其實好唔方便，不過到時再算


第一次飛到羽田機場，呢道冇成田咁多人，好快比我係角位搵到個靚位休息；機場訓得多，不過今次成晚都訓唔著，玩住部電話好精神，所以我都放棄唔訓啦繼績玩電話，最後成晚冇訓過，好彩留係機埸唔係好耐




第二天

朝早大約六點由機場出發，今日將會不停轉車先去到目的地；羽田機埸>品川>新宿>小田原>箱根湯本>強羅>早雲山>大涌谷>桃源台>元箱根>小涌谷>B&B；見到都覺得頭暈，不過轉車好方便唔洗點擔心；羽田機埸比成田機埸近市區好多，坐京急機場線出市區好快，話咁快就到品川站


品川站對出呢間酒店我係2009年時曾經住過三晚，當時係第一次到日本旅行，咁有回憶既地方令我特登出黎望望，時間過得好快已經係好多年前既事啦...


再坐山手線去新宿


七點幾新宿唔多見有餐廳開門，見有松屋就入去lu，今次又唔小心叫左自己唔食既野，唔緊要仲有隻蛋同白飯放得入口


黎到小田急鐵路繼續轉車，先係旅遊中心買呢張箱根pass，￥5140包晒箱根將會坐既所有交通工具同新宿來回箱根車費，好抵用又唔洗煩




由新宿坐小田急線到「小田原站」，再轉箱根登山線到「箱根湯本站」，終於黎到箱根啦




箱根湯本站人頭湧湧，呢個係箱根登山鐵道總站，而且又係大車轉細車，基本上大部份人都會係呢道坐車上山，撞岩秋天旺季所以咁多人


一陣就係坐呢啲細細部既電車上山；箱根登山鐵道係日本唯一一條登山電車線，大約40分鐘可以由海拔96米既箱根湯本站上到海拔541米既強羅站




箱根啲葉睇落都唔係好紅咋？




電車有時會「之」字形行駛，又前又後，一路睇住風景好快就去到強羅站




係強羅站轉坐箱根登山纜車向早雲山出發，呢部就好似香港山頂纜車咁用纜拉部車，不過就冇咁斜


沿路見到唔少紅葉，係好紅好紅既紅葉！


話咁快就上到「早雲山站」




再轉箱根空中纜車上山；上車前會派濕紙巾比大家，話一陣可能會好臭比大家以防萬一


纜車車箱比昂平360大，可以坐到十幾人，好快就上到車


山上好多葉都變晒色，小小紅小小黃咁，未算係心目中既紅葉，不過第一次見到咁多變色既樹都好開心，仲有藍天襯托已經好滿足




仲好清楚見到富士山！


就到站既時候見到出晒煙，仲好大陣硫磺味，唔怪得要派濕紙巾比人啦；氣味係臭左小小，仲算可以接受，一路望住個山噴煙，穿過啲煙後就到「大涌谷站」




到左超過一千米山上，太陽非常好，但就好大風對手凍凍地


行近去睇硫磺味特別勁！除左氣味同出煙之外，仲有好大既聲音發出，估唔到可以同火山咁接近（呢道幾千年前曾經爆過，留低左而家見到既火山遺蹟）




山谷之中所有野都變成白色


就算離開噴煙位置，成個大涌谷都有小小硫磺味




山上小小噴煙既地方其實係溫泉，係熱到可以整溫泉蛋既溫泉，可惜今次條路封左唔可以行上去睇，以前見人可以行到上山上面參觀架






天氣好既時候係可以見到遙遠既富士山，富士山始終都係有啲雪先靚，諗起自己曾經係山頂行過一圈係一件好不可思議既事




大涌谷最出名既食物一定係呢個雞蛋，同平時見既蛋唔同呢個蛋全粒都係黑色，原因係佢用溫泉水浸，泉水既硫磺會將蛋變成黑色；話就話用溫泉水浸熟，可能啲水太熱雞蛋唔似想像中既溫泉蛋，只係普通既蒸雞蛋，不過都好食既；買一包有五隻蛋咁多，食得多驚膽固醇超標！雞蛋仲有另一個作用，係可以做暖蛋！




呢道既手信鋪好大間，仲有幾間咁多，要行可以行好耐，好彩比我買到上次買唔到既富士山公仔，總算有收獲




坐纜車向下一站出發




一路都係咁靚既山景


前面就係一陣會到既「蘆之湖」


突然覺得呢道有小小似瑞士


開船前仲有時間，係碼頭附近四圍行行，呢邊既紅葉真係紅色（好似係廢話）






唔知點解叫海賊船呢？


去排隊時已經好多人，不過部船好大唔怕冇位






由船上望返「桃源台」，後面有紅葉背景襯托係好靚




蘆之湖兩岸都係變左色既葉，好靚；不過唔知係唔係遲左黎，好似好多葉都灰晒？








配上藍天白雲成個環境都好靚




坐到蘆之湖南岸「元箱根」落船


一出黎見到座大鳥居同便利店，乘機買小小野食，坐係湖邊望住靚景食野個飯團都變得特別好食，哈哈




沿湖邊慢慢散步，向水上鳥居前進










去到箱根神社，不過冇正式入去參觀，只係想去睇鳥居咋




到左啦，有人排緊隊；呢個水上鳥居當然冇宮島個咁大，不過水上鳥居比較少見，所以覺得好特別


由鳥居呢邊望返去碼頭方向




四點太陽已經差唔多落山，三點幾就開始天黑，冬天時間唔係太好用，相反夏天日照時間長好多好多




行返去碼頭邊巴士站準備坐車走lu






見到咁多人排隊都知大獲，我想坐個部車呢個係中途站，部車黎到時一早已經滿晒...等左超過半個鐘，走左唔知幾多部車之後終於上到，本來仲想行去總站一係坐去總站再坐返轉頭


又上山又落山，終於去到落車既地方「小涌園」


見附近有便利店就買定晚餐，一陣住個道真係咩都冇


再坐穿梭巴士去到今晚住既地方


今晚就係住呢間平價溫泉旅館，比想像中大好多，好多人住


房間係好舊式既設計，對我黎講冇咩所謂，我都係咁訓架啦；不過呢間房係冇廁所，要去出面個個，但非常乾淨唔洗擔心




我既晚餐就係呢個啦


食完野抖左陣就到今晚最重要既溫泉時間！呢個溫泉一定冇正式溫泉酒店咁靚，不過一樣浸得好舒服




浸完溫泉搵左個杯麵出黎食，見池袋大勝軒咁出名就試下佢，但我覺得冇平時食開既出前一丁咁好食；食完杯麵又去浸多次溫泉！




暫時都係想像唔到自動售賣機可以點整到咁多野食！


浸過溫泉出去行下，山上咩都冇又凍，都係快啲返去訓算lu；神奇既地方係琴晚冇訓過但今日一樣咁精神，哈哈