飯能紅葉。東鄉公園紅葉祭﹑飯能聖地巡禮

< 東京﹑箱根﹑飯能8天遊 >

第四天（續）

今日另一個睇紅葉地方係位於飯能既「東鄉公園」，呢道係一個冷門地方，網上唔多見有人介紹，話晒我係飯能fans又好好彩比我發現左呢道，我覺得呢道既紅葉係今次旅程之中最靚



東鄉公園雖然位於飯能，但距離市區有啲遠，由飯能站要再坐「西武秩父線」，車程大約二十五分鐘；呢條鐵路唔算熱門路線，要三十分鐘先有一班車




沿途經過既都係鄉郊地方或者小村落，住係咁天然既地方一定好舒服




去到「吾野站」落車；今日係星期日，而且又係一年兩日紅葉祭日子，有唔少人都係呢道落，平時呢啲站相信人影都唔會多個




車站月台冇天橋，要等列車開走後跨過路軌去到出閘機離開




車站有東鄉公園海報，紅葉唔係真係紅得咁誇張掛？


吾野站對出除左有間小餐廳外就咩都冇，就算民居都唔多，紅葉季以外應該係一個清靜地方




如果係平時就要自己行去東鄉公園，我估半個鐘內可以行到，今日紅葉祭就唔洗行，有免費穿梭巴士接駁；第一部車上唔到後好快就有第二部車到，所有列車乘客都順利上晒，其實唔算好多人黎


幾分鐘車程好快就到，落車一望可以用「嘩」黎形容！超多紅葉！而且係好紅好紅既紅葉！








今日係祭典日子，除左有美食車外仲有好多小攤擋，賣既野同其他祭典活動大同小異，見慣見熟；就算係咁，見到啲野食就算唔肚餓都會比佢地吸引住，環境氣氛會令人好想食野，最後我都忍唔住要買野食啦








次次係日本都要食一食章魚燒先安樂




對住咁靚既紅葉食野，食環境都夠好味




小小既相片展覽展出東鄉公園紅葉靚相，好靚架；我影既相同人地冇得比架啦，不過用眼睇比起睇相睇好多，相係感受唔到前後左右四方八面都比紅葉包圍既感覺




紅葉時間會收100円


開始行樓梯上山，沿路都係紅葉














上山途中都有小食攤檔




東鄉公園因佢而命名，有銅像作為紀念（歷史野唔講咁多啦，因為我都唔識）




再上繼續係好多紅葉，全部都係紅葉！








呢個位最熱鬧，有舞台有小食檔，今日黎得遲舞台表演已經全部結束，小食檔亦都準備收工而大平賣；最靚最多紅葉就係呢道對落位置，由高向下望成個山谷都係紅色，超靚！














係飯能又點少得飯能代表「登山少女」！


老人家有專車接送上落山，服務好好


離開最多人既地方繼續上山，上面冇咁多紅葉，山長水遠黎到都行上去睇下啦，天氣咁舒服當係行山都好






經過幾段好斜好斜既樓梯，終於望到山頂曙光；呢道冇山下咁多紅葉，大部份人都唔會攞苦黎辛走到咁高，其實上山既路唔長，中間又有神社參觀同休息，唔難行既




山路盡頭係「秩父御嶽神社」（秩父？呢道理論上唔係秩父市，仲係飯能市之內）






山頂位太多樹，只可以望到小小外面景色，唔經唔覺就上到咁高




唔留太耐lu，為左搭最後一班穿梭巴士又要起程落山


頭先上山行過既樓梯！如果行返佢落去隨時行到腳震，好彩有另一條易行好多既路方便落山


呢條係整得好靚既山路，又易行又有行山feel，如果唔係想試個條直樓梯既話行呢道上易行好多






沿路都有唔同建築，途中仲遇到一家好熱情既日本人，去到唔同地方都主動幫我影相，傾開計知道佢地有一個竟然黎過香港幾年做野！








一路望住紅葉向山腳行去












順利去返入口位置，岩岩好上到最後一班穿梭巴士，唔洗自己行去火車站；東鄉公園呢道可以話係今個紅葉之旅紅葉最靚既地方，好多紅葉都係鲜紅色，超靚！隨左大量紅色樹葉之外，仲有好多黃色﹑橙色既葉構成一個超靚風景，數量又密又多，感覺比起之後去既紅葉名所高尾山更靚；另一個好既地方係呢道今日有活動好熱鬧，但唔會覺得迫人，行得好舒服，而且呢道唔係遊客地方，黎左幾個鐘都冇遇過其他外國遊客，唔洗擔心又嘈又多人




去返吾野站，運氣好可以坐到直通池袋既車，就算唔到池袋都唔緊要，去到飯能一樣可以轉車返池袋




話晒飯能係我最鐘意既地方，一埸黎到點都要出市區行下先安樂，係「飯能站」落左車；係車站觀光案內所遇到同樣黎朝聖既fans，又有秋天限定產品，唔洗諗買左先算




日本好似唔興食下午茶？五點零鐘出到黎都唔知食咩好，見好多餐廳寫日文又唔敢入去，行左陣都係食吉野家算，唔怕叫唔到野食；食野時睇住兩個職員做野超快手，兩個人就打理好一間鋪，人多時出餐都極快！


一定唔少得去主角「葵」做野既蛋糕店，蛋糕甜品都好吸引，又係想唔幫襯都唔得






除左賣甜品外，話明聖地當然唔少得賣動漫周邊產品，選擇唔多總好過冇，話晒呢套係冷門野








成功搵齊四位主角








行山用品店都有好多正野賣


一套咁冷門既動畫希望出到第三季啦，可能因為冇人買中文版漫畫出左四本就停左冇再出，好彩日文版仲繼續有


火車站對出最旺既大街，都係冇咩人


上次係道食過咖哩飯架


夜晚冇邊道可以去，去返火車站百貨公司行書局超級市場


牛肉又平又靚，仲要唔係平價都有七折，最衰懶煮...




書局放晒新海誠作品出黎，我差唔多有齊晒，哈哈


返到池袋出左個唔知咩出口，google map係高樓大廈之中定位唔準，唔知自己去左邊，只可以不停向南行，我住既地方係池袋站南面，只要岩方向就一定返到去；今日係第一次正式行池袋站唔熟路，仲諗住唔行地下街行出地面靠定位會易行啲...不過今日之後池袋站地下街已經行到熟晒，無論點行都會搵到最近既出口返去


亂行行左去HMV，呢個正丫！


返到去攤左陣冇野做，本來唔食野都冇問題，見得閒就出去食下野啦；諗住十一點半冇人會排隊食拉麵掛？去到見到條隊又係咁多人...真係咁好食咩？






好彩有電話陪住我，一路玩電話時間過得好快，就到既時候職員會比餐牌揀同預先落單，入到去只要坐底就可以等開餐；揀左食呢個自稱「最有人氣」的拉麵，睇相見佢好足枓


我一個人已經係快入得去，咁岩前面有一個位比我爬左幾個人頭，但都等左四十五分鐘，成間鋪好似得十幾個位，想唔排長龍都冇可能


坐低好快就有麵到，賣相唔差但一定冇圖片咁靚架啦，算係好足料，由其係幾塊肉超厚，比一般拉麵叉燒厚身好多，仲煮得好滑，係好食既，不過我唔係太鍾意食肉，都係平時啲薄叉燒更岩我口味；拉麵湯底好濃，算係一碗好食既拉麵


十二點九食完出黎，外面一樣有好多人排隊，半夜係街排隊食拉麵睇黎大家都好有決心，話晒呢間係好出名既拉麵店；東京出名既拉麵有好多，如果唔係咁得閒我先唔會為左食拉麵排成個鐘，今次就當係消磨時間啦