東京紅葉。高尾山

< 東京﹑箱根﹑飯能8天遊 >

第五天

高尾山係東京其中一個觀賞紅葉出名既地方，每年約十一月中係紅葉最靚時間；今次到東京時間岩岩好，而且上次高尾山落雨睇唔到風景，又買唔到想要既野，所以又再去多次高尾山啦

今日又係遲出門口，過左九點半先出去；一早都知道住既附近冇咩野食，求其食個早餐算


由東京市區去高尾山最方便係由新宿坐「京王高尾線」，直接去到高尾山山腳；係新宿京王線售票機買左高尾山pass，包新宿來回高尾山交通同上落山來回交通，比分開買平少少同慳返次次買飛時間




大約一個鐘車程去到「高尾山口站」，踏出車箱已經望到外面有好多紅葉，相信一陣上到山一定更多更靚




車站出口對出有好大棵銀杏樹，郊外天氣比市區凍，銀杏葉已經跌左唔少，相反東京市區內仲有好多金黃色銀杏葉係樹上，而且有啲銀杏葉仲未變色






有水喉比人刷鞋咁有趣，行完山都唔怕對鞋污漕


火車站行去纜車站一小段路已經有好靚既紅葉，同一棵樹可以有唔同顏色，有層次感好特別










高尾山纜車站比好多紅葉包圍，紅葉樹仲特別大棵










有好多條路上到山頂，想行山可以行呢啲山路上，係咁天然既環境睇紅葉相信更有風味；我懶行當然唔會直接行上山咁辛苦，坐纜車或吊椅上去輕鬆得多，一早已經買好來回車飛，諗住纜車上吊椅落，不過纜車吊椅都只係上到半山點都係要行


旺季係唔同啲好多人等車，上次夏天加上落雨冇咩人上山




入到月台仲要迫上車，估唔到一部纜車仔坐到咁多人，班次又密唔洗等好耐




見得最多高尾山紅葉宣傳相就係影纜車上山，好多poster都影佢，但實際上坐纜車係見唔到咁靚既紅葉，先唔講部車咁多人想望出窗外都難，就算冇人都唔會係最靚觀賞角度，除非好似poster啲相咁由上面影返落黎




幾分鐘車程就上到山，咁早已經咁多人排隊落山


車站旁邊賣天狗燒一樣排滿人，直頭見唔到龍尾




今日視野唔太好，但總算好過上次，上次係一片白色咩都見唔到，今次望到對面山已經好好




行幾步就見到好熱鬧既鋪頭，食野又係要排隊






上次黎個時呢道冇開門，搞到我專程黎買都買唔到！今次終於比我買到呢隻飛鼠啦，哈哈（最後都帶唔到佢返香港...唉...）






上山途左經過一啲影相位，之前已經影過冇特別停低，加上冇紅葉冇咩特別
















又去到食野地方，同上次一樣買返串烤團子，上次食左白色今次食黑色，我諗除左顏色唔同之外實際上冇咩分別






拎到上手睇冇咁靚，已經唔係圓形...


有免費茶提供，凍凍地飲熱茶係唔錯




難得黎到比你出下鏡先


行上啲去到藥王院，紅葉多好多，再配上舊建築襯托特別靚










好多地方都有人排隊




藥王院有超過一千年歷史，寺廟沿山而建，向上行會經過好多唔同建築；其實我連藥王院供奉邊個都唔知，而且太多唔同神明更加唔識分，今次都係好快咁路過冇特別去留意，如果有機會再去既話一定要細心了解一下














離開藥王院範圍後比較親近大自然，行呢啲山路上山；路唔難行，不停行之下用左十分鐘就到山頂，沿路可以感受到陣陣秋意，可惜既係今次又落雨囉！










再次黎到高尾山頂，除左有幾棵紅葉之外冇咩特別，因為跟本咩都睇唔到！








由呢道望出去理論上係望到好遠，富士山都可以見到，不過呢...咩都睇唔到...






咁既情況都唔預可以睇到風景，唔再行出去其他地方睇風景lu，學人搵個地方坐低食午餐算；有瓦遮頭靚位一早坐滿，同其他人一樣坐係樹下，只要唔洗比雨淋到就得，拎出頭先係車站買定既壽司慢慢食








天氣慢慢變得更差，霧開始大雨又開始大，唯有快啲落山










本來計劃行呢條四號路落去，見條路咁濕都係認輸，今次冇著行山鞋唔想碌落去，行返頭先上黎既一號路最穩陣


穿過藥王院向纜車站行去




















連頭先買飛鼠間鋪頭都未到，竟然見到纜車隊尾！有冇咁多人排隊丫！都唔知有幾多百人係道排隊，冇計啦突然落大雨個個都趕住落山，而且坐唔到吊椅個個黎排纜車，我估自己行路落山會快過排隊坐車都唔定，不過既然買左車飛就照排啦...好彩鋪頭有遮賣，起碼唔洗比雨照頭淋








天狗燒冇晒人排隊，幾想行去買黎試試，但又唔方便行開，唉...


唔算排左好耐，大約45分鐘終於黎到上車，比想像中快啦


高尾山代表動物飛鼠








比預期早左落山，記得高尾山特產係蕎麥麵，呢道又有間算係出名既蕎麥麵店，決定入去食下午茶順便坐下；呢間蕎麥麵店設計好有古代氣息，感覺令人舒服


客人入去時要自已係登記表上寫名，有位時職員會叫名請大家入座，個個都寫日文名突然唔知寫咩上去好，唯有是但寫個啦


食呢個冷蕎麥麵，係好食既


食完出黎天已經黑晒，返東京lu；可能天氣唔好又或者唔岩時候，高尾山紅葉冇想像中咁靚，琴日東鄉公園紅好多靚好多，不過高尾山都有靚既地方，藥王院建築襯紅葉超靚，如果好天景觀開揚都會靚好多




返到東京去左池袋Sunshine City，其實係想黎Pokémon Center睇睇；新個批小精靈全部都唔識，只係識啲舊野，而且新個套小精靈風格同以前完全唔同，已經冇興趣再睇
















行完商場返去執背囊，但倒晒所有野出黎都見唔到隻飛鼠，究竟去左邊呢？醒起頭先係地鐵站掉過背囊入面既垃圾，咁岩袋垃圾同飛鼠一樣係用白色膠袋裝，十成十係比我順手一齊掉埋（掉個時都覺得袋野咁重望多左眼先放入垃圾筒，但發現唔到...）！即刻坐車返「新宿三丁目站」站，地鐵職員好好人開左垃圾筒同我一齊搵，可惜過左超過兩個鐘垃圾已經清理左，冇左lu...飛鼠生存唔夠半日就冇左lu......


路過地鐵站食個烏冬先返去，係道諗聽日返唔返高尾山買返隻呢？最後都係冇去到，高尾山太遠路唔去啦，相信有緣既話總有一日會再同飛鼠相遇（而家呢刻已經有兩隻掛左係屋企，哈哈）