東京紅葉。日比谷公園﹑花園神社大酉祭

< 東京﹑箱根﹑飯能8天遊 >

第七天

今日終於到左離開東京既日子，朝早執好所有野，將大背囊放入池代站locker，正式開始今日行程

又再次去到池代Sunshine City，呢道有大型書局﹑文具精品店，有好多岩我買既野，要作最後衝刺




仲有就係黎Pokémon Center抽呢個一番賞，可惜抽唔到想要既野


坐地鐵去到「日比谷公園」，一行入公園入口就可以感受到秋天氣息，樹葉話比我知公園秋天已經到啦




公園冇之前見開既紅葉，但樹葉唔一定鮮紅色先靚，唔同顏色既樹葉一樣可以組成一幅美麗圖畫
















黎日比谷公園主要目的唔係睇紅葉，係黎菊花大會


菊花大會係十一月頭至十一月中舉行，我揀左最後一日黎到，就係咁衰左...平時菊花大會係全日舉行，今日提早結束十二點就完，我黎遲一步...


大部份菊花已經搬走，只有小量仲搬緊，勉強叫可以見到菊花














作為公園呢道係一個好舒服既地方




菊花大會睇唔成，係公園隨意行行，係咁靚既環境之下漫步係一個好選擇








公園外面種滿圓圓地既大樹，一路之隔北面係皇居




離開日比谷公園坐地鐵到原宿，「JR原宿站」係東京都之內歷史最耐既木造車站，之前有消息話車站將會被拆卸，係拆之前黎睇多次呢個充滿古典氣息既原宿站




原宿站對出既銀杏仲係綠色




估唔到聽日竟然係東京半世紀以黎最早既初雪！可惜聽日已經返到香港...如果遲一日走見到東京落雪你話幾好呢？東京雪景好夢幻，可遇不可求...


竹下通多人得恐怖，全條街都係人！行左幾步已經頂唔順調頭行返出去，悠悠閒閒過左咁多日唔多習慣呢種咁多人既地方




原宿所有地方都係咁多人，連食吉野家都要排隊，第一次見多人得咁誇張


比「限定」兩個字吸引，下午茶就決定食佢




旁晚時份去到新宿「花園神社」，神社未見到，只係馬路邊已經見到好多人好多攤檔；今日係「花園神社大酉祭」活動，神社附近好熱鬧，其實我都唔知呢個係咩祭典，都係去左先算，感受下氣氛






路邊見有長長一條入龍，相信係排隊入神社，我都乖乖地一齊排




排左十五分鐘終於見到神社入口，轉個灣就到神社范範圍，呢個時候比我留意到好多人唔洗排隊行出行入？我終於明白入去係唔洗排隊架，排隊係做另一樣野，咁我都即時離隊唔排lu，直接行入去算




入到黎左右兩旁都係攤檔，食既睇既玩既咩都有，超級熱鬧




咁多人排隊原來係排緊入去參拜，我入唔到去只可以係門口望望，上面掛起咁多燈籠好靚好靚






好多呢個賣，唔知係咩呢？同車公廟風車差唔多形狀，有大有細，好多人拎住






神社入面所有地方都係咁熱鬧，人雖然多，但大家都好禮讓，唔會迫黎迫去，行得好舒服




離開神社，路邊係一大排攤檔，可能比入面更多；攤檔主要係賣野食，我岩岩食完野冇胃口再食啦，只係得個睇字；就算食唔到，見到咁多日本特色小食都好開心，香港唔會見到呢啲咁特別既野
























































行完花園神社，今次日本旅程都接近尾聲，返去池袋超級市場買啲野，拎返locker入面既大背囊，係時候去機場


今次係羽田機場返香港，好快就去到


第一時間check in將大背囊寄倉，比我執到岩岩好20KG，哈哈


今日晚餐就係呢個；話說日本既三文治超好食，麵包軟餡又正，日日食都冇問題


獲得「合味道杯麵世界大賽」第一名，香港代表香辣海鮮味


仲有時間就係機場入面四圍行，有啲地方都幾靚






有個靚位比大家睇飛機，但毛毛雨加上大風係好凍，睇一睇就入返去lu，夜晚又唔係睇得咁清楚










零晨時間起飛，大約四點返到香港，日本再見！




第八天

呢班機時間又幾好，七點返到屋企，沖個涼之後返工都冇問題，可以玩到盡，哈哈


今次紅葉旅程完滿結束，非常滿足！第一次見到咁多咁靚既紅葉，仲有色彩繽紛既秋色，總算冇去錯地方；如果有機會我都想再去睇紅葉，就算同一個景色有紅葉襯托之下係靚好多好多，可以繼續睇多啲靚景就好啦

< 東京﹑箱根﹑飯能8天遊 >

< 完 >