東京紅葉。築地市場﹑明治神宮外苑銀杏﹑你的名字朝聖﹑無敵家拉麵

< 東京﹑箱根﹑飯能8天遊 >

第六天

今日唔再去咁遠，會留返係東京市區，行程好輕鬆；一路有留意東京市區邊道有靚紅葉，可能市區天氣冇郊外咁快凍大部份樹葉都未咁快變色，呢個時間可以睇到靚紅葉機會唔大；其實都冇咩所謂啦，之前睇左幾日已經好滿足睇到夠，唔再四圍去搵紅葉啦



朝早六點突然震醒左，震左一段時間，好彩強度唔足以令我離開張床；順手拎起電話睇睇，嘩...又係福島仲要7.3級地震！東京市區震度只係三度唔會有影響，亦好彩今次地震冇嚴重傷亡；之後繼續係張床上面冇再訓lu，咁岩有位朋友未去過東京想黎玩問我好唔好玩，我諗最有說服力既一句係「我而家就係東京囉！」，佢又真係即刻買左東京機票

今次旅程盡量都輕鬆啲唔咁早出發，仲好多時都早返去，咁係因為今次我唔係自己一個去，一定唔會玩得咁過份，如果得我自己一個可以一早六點起身出門口玩到尾班車先返去；今日朝早十點半黎到築到市場，雖然已經黎過而且又唔食海鮮，但點都要帶人黎一黎朝聖既


未入市場已經迫滿好多人，一向覺得築到市場係遊客地方，睇一睇原來都有好多日本人係道食野




今次陪人黎冇點影相，啲海鮮抵唔抵買亦都唔知，只係覺得小食個啲比其他地方貴，味道都冇想像中好食（唔係我食架），係呢道食野當係食風味就算，叫做體驗下當地特色












呢啲人氣咁高既壽司店相信應該好食，就算要排幾個鐘都阻止唔到大家既決心


係我去既時候岩岩有兩座新既商場開幕，同旁邊築地場外市場一樣都係好多賣海鮮﹑零食﹑餐廳等等既鋪頭，等如將場外市場複製左入室內一樣








電視台都黎影


經過築地本願寺唔入去lu，去旁邊地鐵站搭車




對面有間「香港屋」餐廳，好後悔冇去八掛下有咩食


今日午餐黎到呢間專門食牛肉既餐廳，夜晚既話成隻牛唔同部份都可以食到，午餐時間冇咁多選擇，勝在價錢平一啲


中午冇咩人食野，湯都未飲晒牛肉就黎到


呢個佢話係A5黑毛和牛，第一次食唔知佢係唔係真呢？睇落冇平時見到既咁多白色條紋？


呢個其實我都唔知咩黎，餐牌上成行字除左個「牛」字之外都係日文字，順手就叫黎睇下，但就算黎到見到我都係唔知咩黎


開頭仲以為得咁少肉會唔夠食，食食下連碗飯都食完仲有成半肉未燒，一路食飯一路燒肉原來唔係咁方便，好怕啲肉會燒燶；今餐啲牛肉係好食既，不過感覺上冇啲人話到入口即溶咁誇張，唔通要再高級啲先會咁？


食完午餐坐地鐵去到「青山一丁目站」，出黎行幾步就見到「明治神宮外苑」銀杏樹，頭一段有幾棵樹仲係綠色，其他大部份都係金黃色；前面冇陽光顏色冇咁靚，後面個啲有太陽晒住顏色鮮艷好多






遊人多但唔迫




陽光之下銀杏超靚！






行人路上全個頭頂都金黃，地面亦都一片金黃，係一個黃金世界






樹葉仲可以玩架


馬路變成行人專區，係邊個位欣賞都冇問題








行到街尾欣賞過所有銀杏，即時開始下一個行程；明治神宮外苑呢個位係「你的名字。」入面出現過，有冇印象呢？


離開銀杏樹向北慢慢行大約十五分鐘就去到「JR信濃町站」；有啲樹樹葉已經跌晒，大部份樹葉仲保持青綠






黎信濃町站就係為左呢條橋，出過好多次場，其中一個重要地方！




橋上望出去兩旁都係銀杏樹，大部份仲係綠色，只有小部份岩岩開始變黃


有fans係橋上面影緊相bor


呢個位都係另一個電影見過既場景


由信濃町站向北行十五分鐘去到「須賀神社」，唔洗講都知呢個係咩地方啦！唔少人係道影緊相！








其他遠既地方就唔去住，有機會先再去啦；去到上野行下順便買野，呢道可以買到好多無聊零食




返到池袋又四圍行




四圍行之下返去放低野已經十點半，可以出去食晚餐；呢個時間附近都係得無敵家可以食，咁又去食多次lu，順便陪人去食


今次時間早左小小仲多人排隊，前面有個疑似明星（好似係講中文），無論排隊定食完出黎都有人同佢影相，仲有fans係門口等佢出黎，但我唔知佢係邊個




排隊時上網見到今日Family Mart有呢個夫妻日特別版蛋糕，即刻入左旁邊個間買，其實冇咩咁特別只係多一粒士多啤利，見到咁好食既蛋糕忍唔住即刻比我食左


今日排得耐過上次，排左一個鐘先入到去，又多人又細間冇計啦


頭先食左蛋糕唔食咁多野啦，食一塊肉就算，味道ok啦我鐘意呢種味道，見到湯底咁濃就知夠晒重口味，岩晒我，哈哈


聽日就要返香港，食完野返去慢慢執野lu；今日去左唔係好多地方，離開須賀神社之後就係去唔同地方搵野買，但最慘既係要幫啲唔識既人買野呢！仲要係買洗頭水呢啲無謂野囉！自從上次東京開始，唔知點解阿媽識個啲所謂「街坊」就係咁叫我幫手買野，仲要樣樣都要指定牌子，又係啲冷門野又買得多，唔係好多藥房有賣，就算有都試過唔夠貨要再搵，最白痴既係連洗頭水都要叫人買，講緊既係1000ml既洗頭水，講出黎個個都冇腦啦，明明香港都有得賣，為左一枝慳三四十就叫人係日本晒時間搵啲咁既野，仲要由日本送到上佢屋企，想唔講粗口都唔得！不過為左比面阿媽就算，照買！估唔到啲人面皮唔知幾多尺厚，今次又要為左班唔識既人買洗頭水！我自己連秋葉原都冇時間去丫，為左洗頭水就冇左幾個鐘，都唔知係黎玩定做義工幫人運貨？？！平時朋友同事叫我幫手買野我都有求必應，最少朋友會知道我咩背囊一定唔會要我買啲又重又無謂既野，如果見到啲得意或又平又靚既野我仲會即時whatsapp朋友問有冇人想要，衫褲鞋襪呢啲幫人買唔少，不過呢啲係買得好開心，而且一定唔洗我浪費幾個鐘專程去搵囉

--------------------------------------------------

［下面呢啲係唔關今次旅行事］

見講開「你的名字」就順便分享下東京你的名字cafe，cafe係期間限定，東京呢間已經唔再存在，而家唯一一間係福岡都係去到五月尾就完，我諗應該冇咩機會去到啦...

cafe外觀








cafe好多精品都勁靚，好多都好搶手一早已經賣晒










cafe入面




最重要係食呢個，係唔係同戲入面一樣呢？




我一向都係新海誠老師fans，佢既作品我諗全部都睇過，主要個幾套戲我連設定集﹑小說﹑漫畫都有收藏（你的名字漫畫中文版未出晒未買得住），下次再去東京既話一定會去唔同地方朝聖！