尾道。千光寺﹑貓之細道

< 福岡﹑廣島﹑尾道﹑山口6天遊 >

第二天（續）

尾道係一個寧靜地方，城市細旅遊景點唔算多，相對旅客都唔會好多，或者呢個就係尾道其中一個吸引既地方



由三原出發向東坐兩個站，十二分鐘就去到目的地「尾道站」






由尾道站出面向山上望，清楚見到「尾道城」係車站後面小山丘之上，可惜今次唔會去參觀




「尾道商店街」係車站旁邊，即刻行入去避開個大太陽；呢條商店街比大城市既商店街靜好多，街好長但行人唔多








商店街既鋪頭同平時見開既好唔同，呢道既鋪頭睇落好傳統，賣既係日常用品多，連鎖餐廳藥房係唔會見到












拉麵係尾道其中一樣出名既美食，今日午餐嘗試去搵呢間出名既拉麵店，就係商店街旁邊好易去，只可惜去到見咁多人排隊，無緣一試


其實仲有其他出名既拉麵店，唔想媽媽行咁耐係附近見有另一間拉麵店就入左去，見有咁多本地人食相信唔會差既




睇個湯底都知尾道拉麵唔係平時食開既豬骨湯底，呢個就係尾道拉麵獨特地方




食飽就上山啦，估唔到纜車站隱藏係咁唔顯眼既建築之中


時間岩岩好，上到去差唔多開車，遲小小都未必迫得入




呢座山唔係好高，好快就上到山頂




山頂位置唔係好大，有觀景台﹑鋪頭，仲有小小擺設比人影相










上山都係為左睇風景，呢道睇到尾道沿海景色，亦都見到對岸向島








食個刨冰清涼一下後就落山lu，今次唔坐纜車直接行落山，座山唔高相信好快就到










由本州向尾道大橋行，經過唔同既島同瀨戶內海會去到四國


山腰位置有寺廟「千光寺」












見到有貓相信就到尾道另一個出名既景點「貓之細道」


貓之細道有好多以貓做主題既裝飾，鐘意貓既朋友一定搵到好多影相位






















除左貓之外好多建築物舊得黎好特別








經過棵大樹代表差唔多到山腳啦，有小小可惜既係貓之細道雖然多裝飾，但真貓反而好少見，只係見到兩三隻咋，同今朝免島啲兔仔比有啲失望都好正常啦？


又去返商店街


又去海邊行下


行返尾道站搭車走lu，次次見到火車路口都覺得好有趣






係三原站轉車見有時間就出去望望，出面冇咩特別




坐新幹線返廣島




五點鐘返到廣島，如果要繼續行都仲有地方可以去既，不過長輩們話冇興趣咁只可以返酒店啦，沿河邊行就返到去






諗極都唔明呢啲垂直一棟既停車場係點運作？！


係酒店休息左一陣出左去買生果，呢檔啲生果平靚正，日日都幫襯


返酒店食完生果，八點出去食晚餐；媽媽好鐘意食鰻魚，咁岩酒店隔離就有間專食鰻魚既餐廳，睇外表咁有特色應該唔差，網上仲好多好評，咁就揀佢啦；呢間餐廳除左鰻魚我諗都冇其他野食，但我又唔食魚，冇理由入去齋坐既，送左佢地入去我就走lu，酒店就係正旁邊唔怕佢地唔識返去




我就去商店街行下，最重要係返御好燒村食野，今晚仲唔比我食到，哈哈


咁多間好難揀，有啲坐滿人有啲又冇人，都唔知食邊間好，最後是但入左間半滿既鋪頭






我個御好燒就係出面，一路睇住廚師整好開心，仲開心過有得食，就算唔食得都睇得


用鑊鏟食？


原來廣島風御好燒係咁既樣，第一次食咋，覺得賣相唔錯


之前仲以為係成個放上碟食，好彩食之前睇一睇隔離，係要逐少逐少切出黎放上碟，其餘留返係鐵板上保溫；御好燒味道好岩我口味，我就係鐘意食炒麵




食完就返酒店啦，夜晚大部份鋪頭都已經關門冇野好行；由商店街行去酒店只係幾分鐘路程，中間幾條街全部都係餐廳，夜晚都好多人，不過我諗呢區都吸引左好多夜浦人士，怕危險既話都係行大馬路最安全