鹿兒島市內遊

 < 鹿兒島﹑宮崎﹑指宿﹑熊本6天遊 >

第一天

朝早八點半機出發到鹿兒島，機程大約三個鐘；飛機飛過指宿上空見到指宿地標「池田湖」同「開聞岳」，仲有好靚既海岸線，好期待過兩日去到指宿呢個咁靚既地方


鹿兒島機場只有四條國際航線，呢個時間只有一班機降落，加上職員做野好快手，由落機到出去接機大堂唔洗二十分鐘；國際線大樓好細，出到黎一眼睇晒，只有一間遊客中心


坐車要行返去旁邊國內線大樓，兩三分鐘就行到；鹿兒島機場最特別既地方係有一個足湯，就係巴士站旁邊，等飛機等巴士都可以享受一下，我想快啲出市區就唔浸佢啦，快啲上車仲好


係售票機買左車飛後即刻上車，時間岩岩好，去鹿兒島市區既巴士十五分鐘就一班唔洗大趕都得，只係想快啲出去食野都係要早啲上車




巴士超準時，五十分鐘車程就到鹿兒島中央站，車費￥1250，機場距離市區好遠有幾十公里路程


去到市區第一時間就係換好啲火車飛先，有啲車全車指定席換唔到既話就要改過晒啲時間，到時就有排煩


一早寫好所有想要既班次比職員，順利換晒計劃好既六程車，安心晒；今次會用呢張「南九州PASS」，三日內任搭南九州JR列車，仲包括特色列車，之後三日就靠晒佢；張PASS只係￥7000好抵用，我係香港買定仲平小小




換好JR車飛再去對面觀光案內所買呢張「Welcome Cute Pass」，可以係鹿兒島市內坐巴士﹑電車﹑渡輪，遲啲會用得著；完成晒準備工作就可以出走玩啦




鹿兒島中央站同好多車站一樣旁邊係大商場，暫時唔入去住先去食午餐




係中央郵局行前小小入左間炸豬扒店，食鹿兒島其中一樣美食黑豚肉




成功係二點半關門前入去，睇住廚師由塊大豬肉上面切塊豬扒出黎，再用野敲打同落調味料，再新鮮炸出黎，只係睇都覺得好正


我只係叫左塊細豬扒，炸出黎都唔細架，￥880好抵食，最重要係超好食！又香又滑！未係香港食過咁正既豬扒！同時間有客人叫左塊大豬扒，切出黎時好似大好多，炸完又好似只係大小小，又會咁神奇




食飽去返旁邊鹿兒島中央郵局，想買郵票同明信片，明信片就有得賣，不過啲特別郵票就冇放出黎比人揀，所以買唔到...之後行左三間郵局都係一樣冇放郵票出黎，鹿兒島啲郵局係特別啲




JR站有百貨公司，對面有AEON百貨公司，呢頭好多野買




去左Pokemon Store睇睇，細細間冇咩野賣，返而旁邊紀伊國屋書店仲多野睇




行完書局，沿電車路行去hostel，順便搵郵局，電車路兩旁都係金黃色銀杏樹，地下都遍佈金黃銀杏葉，全條路都好靚，一路行一路欣賞






鹿兒島電車有新有舊，遲啲會有機會坐佢






好多地方都有鵰像




順利行到去近海邊既Green Guest House，呢間hostel地點唔太方便，去JR站遠遠地，不過見佢環境幾好就住佢；佢自己一棟樓係馬路邊，最得意係貨車經過時座樓會震，所以佢有貼張紙出黎叫大家唔洗擔心


我就係呢道住四晚，算係舒服，晚晚都好好訓，而且唔貴只係HKD140一晚；有地方坐低就唔想郁，無無聊聊抖左半個鐘先再出去


平時住hostel極小用到廚房，估唔到今次好多機會用到


五點幾鹿兒島已經日落，加上多雲，去到海邊陰陰沉沉咁；櫻島火山就係前面




海豚港主要係餐廳，仲有一啲精品店，鋪頭我就冇興趣啦，燈飾係幾靚既








呢道有個足湯，可以對住櫻島火山浸腳，見啲水好似唔多乾淨唔浸佢




呢道真係好冷清，就算冇觀眾，表演者依然落力


同櫻島講再見，行返去市中心


「山形屋」百貨公司，睇外表都覺得高級，唔敢入去


六點零鐘既商店街冇咩人


今次旅程其中一個重點係去animate買野，黎到第一日即刻黎朝下聖先，鹿兒島呢間比想像中細好多，冇咩野好買，有啲失望...好在之後仲有機會去其他分店






天文館商店街應該係鹿兒島最旺既地方之一，七點幾條街都係唔多人




鹿兒島其中一間出名餐廳白熊冰，出名到今年郵局都用白熊冰做鹿兒島縣明信片代表圖案，不過天氣凍冇咩意欲食冰就真


呢間拉麵店好出名，但都係冇咩人


最多人就係Lawson門口捉精靈


係天文館四圍行下，入下藥房又入下夾公仔鋪，行多陣就返去啦，琴晚半夜出門口冇訓過，聽朝仲要早起身，都係早小小訓好啲；琴晚有全年最大既超級月亮，今晚月亮都算大


到便利店拎係amazon買左既野，見hostel附近有間吉野家就入左去，啲人係開車黎食吉野家咁有趣


今晚晚餐係牛肉飯


amazon啲盒次次都係咁大個，其實入面只係小小野


睇個開車時間都知有幾早


話就話要早訓，都早極有限架啦，玩下電話上下網又搞好夜...