2018年1月6日星期六

霧島。霧島神宮

 < 鹿兒島﹑宮崎﹑指宿﹑熊本6天遊 >

第二天

今日正式開始南九州鐵路遊,向鹿兒島東面出發;離開鹿兒島市區後,巴士鐵路班次會變得好少,一個鐘一班車已經叫好好,為左可以係一日內去兩個想去既地方,所以未天光就要開始今日旅程

由hostel行去最近既JR站「鹿兒島站」大約1.5公里,預計半個鐘點都行得到;5:15出發,一路睇住個大月亮行


鹿兒島站比想像中細,只係一個小車站,我黎到既時間都係岩岩好開門;仲有好多時間先開車,出左去外面便利店買早餐,一陣係車上可以慢慢嘆




JR Pass出動啦,坐開去宮崎既特急列車






車上冇咩人,指定席只得我一個乘客,相反見到對面線開黎鹿兒島既車已經有好多學生,唔係咁早返學咁誇張掛?




本來見咁早起身都想係車上訓一陣,望住窗外漆黑天空慢慢變成燈黃,我都變得好精神訓唔著;係車上望住大海食早餐都係一種享受


大約五十分鐘車程去到「霧島神宮站」落車,全車只得我一個落,我諗正常唔會有旅客咁早黎到




係霧島神宮站要再轉巴士先去到霧島神宮,下一班巴士要59分鐘後先到,即係有排等...冇計啦除左的士之外只有一部巴士可以到




等巴士咁得閒就出去行下;太陽岩岩出黎,可惜呢個位比山檔住睇唔到日出




車站附近都係一啲住宅,仲有一間超級市場,咁早好似未開門冇得行,唯有返去車站繼續等


好多人都話霧島神宮站旁邊有個足湯比人浸腳,我諗就係呢個,乾到見底...


呢啲山區地方又凍又大風,唔想吹要入返車站避風,好在拎多左件外套出黎咋;今日係旅程之中最凍既一日,朝早時間仲特別凍




等左成個鐘巴士準終於到,上車可以暖返一陣,十五分鐘車程去到霧島神宮


落左車都係好凍,唔理咁多行左去神宮先算,郁動多啲個人就會暖




秋天霧島神宮係欣賞楓葉好地方,我黎遲左睇唔到呢道既紅葉美景,只見到小小未落既葉


八點幾表參道上人影都冇個,冇人都係好處黎既,慢慢行慢慢影相都得,我有兩個鐘時間可以唔洗急慢慢睇








有個小小既觀景台


觀景台上望到櫻島火山,亦都望到大海,今日天氣好視野好開揚








日本歷史名人坂本龍馬曾經同妻子黎過霧島神宮同霧島溫泉,呢個旅程被稱為日本第一個蜜月旅行


睇左好耐風景繼續向神宮行去,九點遊人開始黎到,神宮開始熱鬧






霧島神宮好細,可以參拜既範圍基本上一眼睇晒,就係上面張相咁大,只計正殿既話兩分鐘都行得完,當然做其他野另計啦,但佢已經係南九州最大最出名既神宮




有趣既求籤方法,求唔同野有唔同價錢,唔知點解求戀愛求幸福特別貴




另一邊既神樂殿


行返出去lu,霧島神宮再見




仲有好多時間就去手信鋪行行,但佢竟然冇明信片賣!估唔到想買明信片都咁難,琴日已經買唔到!


零零聲聲幾棵紅葉黃葉






去到巴士站見仲有時間再行遠啲睇下,呢間郵局又係冇啲特別郵票放出黎賣,鹿兒島既郵局都係特別啲!


馬路上方超大鳥居






巴士站超大風,自稱唔怕凍既我都要行去後面搵野擋風;頭先係廁所照鏡先知道塊面比風吹到紅晒,唔敢再吹咁多


見好多呢種果


十五分鐘車程又再返到霧島神宮站,今次唔洗等好耐,27分鐘之後有火車,霧島神宮小旅程順利完成




除左霧島神宮,霧島我最想去既地方就係霧島溫泉;霧島溫泉位於山上,可以一邊浸溫泉一邊欣賞大片平原同海景,景觀又開揚又靚,可惜今次時間所限點諗都抽唔到時間去...如果有多一日就好...唔緊要,下次再去過

2 則留言:

  1. 果然係愛情有價.....XXXD
    天未光出發我以為你係去睇日出呢!之後有冇在車站瞌一陣,反正要等成一粒鐘?

    回覆刪除
    回覆
    1. 仲好平tim,係唔係想求返枝好籤呢~
      日出睇唔到啦:(
      之後都冇訓,好精神~

      刪除