東北紅葉。青森。八甲田山﹑蔦沼﹑酸湯溫泉﹑弘前城

< 日本東北紅葉之旅 >

第四天

今日要一早起身，前往青森欣賞紅葉，琴日秋田既紅葉都未算紅，今日去到青森期待欣賞到色彩繽紛既秋天美景，青森係秋田北面，天氣亦都比較凍，相信睇到紅葉既機會亦都比較大


由酒店望出去全部都係平房，早上大館市大霧，希望一陣青森天氣好啦


六點幾鐘就出發，未有時間係酒店浸多次溫泉，不過唔緊要今日會有機會浸其他溫泉


早上大館站好寧靜，連便利店都未開門






咁早只可以坐站站停既普通列車，只有兩卡車箱，坐到去青森要個半鐘車程，去到其實時間已經唔早架啦






大館係總站，上車乘客唔多，要自己開門上車，去到弘前全卡車都會逼滿人




窗外好多時都係呢啲郊外風景




一路行天氣越來越好，去到弘前見到藍天白雲啦


列車準時8:09到達青森站，即時急步行出去巴士站，青森站比想像中大，好彩都可以係8:15巴士開車前到達，可惜準時去到都唔代表可以上到車，前面仲有好多人，大家都係上唔到8:15呢個時間既巴士


所有車都開走晒確定上唔到車之後，我都費事排隊啦，放個背囊去locker先算，本來趕時間背囊都唔諗住放低，而家大把時間慢慢搵locker




四圍行下順便買埋早餐，又再行返去排隊，準備坐8:45開去奧入瀬溪流既巴士






今次好順利上到第一班車，東北JR Pass包左呢條路線，唔洗額外比錢，見好多上車既都係拎Pass既遊客；今次8:45總共開出左三班車，車箱走廊都坐左人，相信排後面所有乘客都上到


係車上可以舒舒服服開餐啦


自從巴士離開左市區去到郊區之後，巴士就比黃色既樹葉包圍，坐係車上都感受到秋天氣息




半個鐘多啲車程去到一個叫「萱野茶屋」既地方比大家落車休息，所有乘客都落晒車，有大約10分鐘時間比大家四圍行下




呢度除左有商店之外，佢既「三杯茶」都係一個特別既地方，傳聞飲一杯可以長壽幾年，三杯又可以再長壽多幾年，大家黎到都會試試，我當然都會試一下




呢度環境好靚，比濃濃秋意包圍








咁上下時間大家都自動自覺上車，又再繼續出發




好快就去到「八甲田山」，未黎之前都知道呢道既紅葉已經落得七七八八，唔會見到最靚既風景，而且今日又搭遲左一班車，可以行既時間唔多，係車上一路都諗上唔上山好呢？最後都係決定一場黎到上左先算


落左巴士即時去纜車站買飛排隊，已經好多人係我前面，來回纜車費￥1850


順利上到下一班纜車；山腳既葉仲係又燈又黃，好靚架！一路搭上去見到啲樹開始灰色，如果早啲黎到全個山都係紅葉呢道應該超靚










纜車企左係一邊風景冇咁靚既方向，唔緊要話咁快就上到山頂




今日天氣算係好視野好清楚，可以望到青森市區同海，我懷疑北海道都可以望到










但另一邊山頂好多雲






睇左陣風景之後就出發，沿山路行一個圈仔






今次真係好趕時間，唯有跑住行，好彩著左行山鞋，唔係既話山上啲路又濕又有泥都幾難行得快








當然遇到風景開揚既地方都會停低欣賞一下


山上有塊小濕地




如果冬天黎到可以見到樹冰


好快就行完一圈去返纜車站等車，而家氣溫得三度，不過頭先一路keep住行又唔覺好凍




都估到落山好多人架啦，所以早左一班車時間黎等，果然不出所料第一班係上唔到，好彩下一班順利上到




落山揀岩方向，向青森嗰邊風景開揚好多








望住啲車係咁靚既樹林中間穿過感覺好特別




落左纜車即刻趕去巴士站，時間岩岩好見到部巴士停左係道，成功趕到計劃搭個班車


後面仲有車到，大把位唔怕上唔到


望住條路都覺得靚到暈，今次旅程真係冇黎錯








路過「地獄沼」，冇咩特別就唔落車


去到「蔦溫泉」落車，呢道巴士都會停大約10分鐘，大家可以自由上落，不過有好多人排隊等上車，落左之後上唔上得返車真係唔知




我原本就係想黎呢道，所以落車lu




藍天白雲見到都覺得開心


就係巴士站旁邊已經見到超紅既紅葉！




成個環境都好舒服好靚




蔦溫泉除左溫泉出名之外，「蔦沼」都好出名，由其日出個陣係最靚，我唔係道住又唔係揸車咁就無緣一見最靚時間；大家黎到都會行去蔦沼，條路鋪得好靚好易行






我覺得沿路景色都靚到痴線，完全係比金黃色既世界包圍！第一次感受到金色世界係可以咁靚！












蔦沼係一個好大既池塘，就算最靚既時間其實已經過左，有啲樹已經開始灰灰地，不過都可以話係好靚，但我覺得頭先行既路仲靚










大部份人睇完蔦沼就會返轉頭，我就選擇左繼續向前行，遊人即刻少左好多，全個世界好似比我自己一個霸左一樣






自然環境比我既感覺真係好舒服




去到一個小池塘叫「鏡沼」，經過頭先咁靚既地方之後覺得呢道冇咩特別，哈哈




再行前多少少就係「月沼」，呢度既樹葉有紅色有黃色有橙色，咁色彩繽紛覺得特別靚












水好清，可以見到水底樹枝






係呢道留左一陣有啲唔捨得走，時間所限都要返轉頭啦，如果有多啲時間可以繼續向前行兜一個圈返溫泉，我怕趕唔到車唯有行返轉頭






再次經過蔦沼


返到溫泉仲有小小時間，繼續四圍欣賞紅葉






行左去最近溫泉既「飄簞沼」，都係金黃色








佢件衫好襯呢道環境，哈哈


早少少排隊等車，順便食個埋今朝買既飯團當係午餐；唔識得整塊紫菜，比我搞到咁既樣








車到啦，再見「蔦溫泉」


坐車返去青森方向，係「酸湯溫泉」落車




酸湯溫泉有三百年歷史，係日本國民保養溫泉地第一號，而佢最出名既地方係「千人浴池」，全檜木造大浴場號稱可以容納一千人一齊浸！而且呢個仲係傳說中既混浴溫泉！




最後我真係入左去浸，話就話混浴溫泉，我可以講我浸個時全個溫泉都係男人，哈哈；不過係我浸完換衫既時候，聽到溫泉入面有女仔聲傳出，望一望又真係見到有兩個女仔浸緊！佢地真係大膽！可惜我已經浸完，哈哈；出黎個時又見到有其他女仔行入溫泉，估唔到有咁多女仔會混浴；浸完呢個溫泉之後成個人都係臭雞蛋味，直到夜晚返到酒店都仲係好大陣味，呢個溫泉一定係真才實料！

未咁快有巴士到，係旅館四圍行下






黃昏既環境更加突顯秋天氣息，更加黃色






上巴士返去青森啦


大約五點半去到「新青森站」落車，個天已經完全黑晒；呢個係新幹線車站，入面又新又大






大約半個鐘車程去到「弘前站」






係弘前逗留既時間唔多，即刻向弘前公園方向行去


有單車專用既停車場咁有趣


郵局六點幾竟然仲未收，見咁有緣即刻入去買返張明信片


弘前氣溫比想像中凍，再加上好大風，啲風可以穿過我件外套咁一樣


用左40分鐘行到黎弘前公園，呢段時間話係有紅葉祭可以賞夜楓，不過呢度既葉都未紅，唔好話係祭典，直頭人都唔多個








咁遠黎到就算冇野睇都要入去行下既，門口呢個位有啲光算係幾好啦，入面好多地方連燈都冇，黑媽媽自己一個行都咪話唔驚




晚晚都見到大大個月亮係頭頂




向住「弘前城」行去


行到埋去睇下...弘前城比想像中細好多...絕對唔係好似大阪城姬路城呢啲咁大座，感覺上佢同一座村屋差唔多...但佢係東北地區唯一一座古城，意義上都係非常重要既


睇完座城就摸黑行另一邊出去，弘前公園又大又黑幾驚行錯路，行行下路個呢個水池算係有少少紅葉，咁就停低影幾張相啦










最後係呢個出口出左黎，夜晚黎呢度真係好恐怖，究竟呢個紅葉祭發生咩事呢？




路過便利店買返塊炸雞食，有塊熱野拎住用黎暖手都好


直接行返去弘前站，都唔知有咩好做，返到去坐定定等車就算








係候車室等左一陣，返青森既特急列車終於黎到




我呢卡車除左我之外就得另一位乘客，傾開計知道原來佢又係比弘前公園紅葉祭吸引黎到弘前，兩個人成個頭都出晒問號，完全唔知呢個紅業祭發生咩事？唔去都去左都係算啦，當係去弘前打個卡




十點半返到青森站，所有地方都好靜，去locker拎返背囊就行去搵今晚既酒店


呢間酒店好易搵，15分鐘內可以行到，酒店下面就係便利店，想買野食都好方便


之前book酒店時冇留意book錯左間吸煙房，成間房就算噴左清新劑都硬係聞到有陣味，除左呢樣之外其實間房算舒服


今晚晚餐就係樓下便利店買既意粉，好鐘意食


食得黎今晚又係好夜先訓；今日成功睇到好靚既秋天風景，比想像中更加靚，所以我真係好開心好滿足，原來日本東北風景係可以咁靚，聽日將會去好出名既奧入瀬溪流，雖然我知道今年啲葉遲左變色，我去既日子未必見到最靚風景，不過我都一樣好期待聽日既旅程