東北紅葉。青森。奧入瀨溪流

< 日本東北紅葉之旅 >

第五天

終於等到去「奧入瀨溪流」既日子，呢道係東北旅程重點；今日天氣好好，相信會睇到好靚風景


今日諗住坐第一班車去奧入瀨溪流，六點幾就起身到酒店餐廳食早餐，好快食飽之後就出發啦




三樓餐廳望出去好開揚，青森大多數樓都唔高


執好行李去返青森站，放低背囊係locker，再去便利店買定野食，就去巴士站排隊；第一班巴士7:45開出，我七點半之前去到前面已經好多人排緊隊，我都唔太肯定上唔上到車


慢慢等前面既人上車，到我既時候順利上到第三部，係我後面仲有好多人排隊，見有好多人都上唔到車


巴士向奧入瀨溪流出發，路過一個觀景台，冇人係道落車


再次去到「萱野茶室」落車，今次三部巴士一齊到好熱鬧




琴日已經試過「三杯茶」今日唔再試，行遠少少睇下風景，呢度既樹葉大部份已經跌晒落地，有一種荒涼感覺








上返巴士，下個落車地方就係琴日都去過既「蔦溫泉」，見好多人都落車我都落去望一望，跟住上返車繼續出發






路過「燒山」，即係「星野奧入瀨溪流酒店」所左地，呢道啲樹葉顏色特別靚


坐左2小時45分鐘終於黎到「石戶」落車，一落車就覺得呢道自然環境好舒服，四周都被樹包圍




呢道係奧入瀨溪流之間最熱鬧既中途站，有遊客中心亦都有洗手間，今日旅程就由呢道開始，目標係行去十和田湖


離開遊客中心行樓梯落去就係奧入瀨溪流




我都唔知係唔係算黎得岩時候呢？樹葉有橙有黃有綠，交織出一個美麗既秋天彩色世界，原本我行路都算行得快，黎到奧入瀨溪流都不其然放慢腳步，一路行一路慢慢欣賞靚景，呢道可以話係每行一步都有唔同風景，一路行一路睇之下時間過得好快好快好快......




我都唔識得點形容呢道，當呢道係童話世界就冇錯
























好多人係呢個位影相，我又試下影先，部相機仔唔期望可以影到啲靚效果出黎，可以影到咁我已經好滿意






繼續享受靚景










沿路會見到大大小小唔同既瀑布




比想像中行得慢好多，靚景係要慢慢欣賞慢慢感受；黎到「雲井之瀧」差唔多十二點半，見到有巴士站諗住可以偷懶上車去下一站，不過巴士黎到已經迫爆人，咁唯有用腳行啦


繼續沿奧入瀨溪流行，享受着住呢個世界咁靚既風景


































呢個時間有好多人黎到奧入瀨溪流，不過奧入瀨溪流全長有十四公里，分散晒啲人完全唔覺得擠迫，一路都行得好舒服，除左係某啲影相位多人之外沿路都唔會特別多人










一路行已經知道唔會夠時間行到去十和田湖，即時改去「銚字大瀧」作為新目的地，仲有1.2km就到


冬天奧入瀨溪流都好靚


拎今朝買既三文治出黎當午餐，呢個好小朋友feel，哈哈


繼續欣賞靚景，到兩點鐘太陽已經開始有落山既感覺，冬天東北好早就天黑，我都要加快腳步快啲行去睇瀑布
























就到啦！


終於黎到「銚子大瀧」，同啲大型瀑布比呢道當然冇得比，不過有一個咁靚既風景襯托就顯得特別精緻，我都忍唔住要影多幾張相












行到呢道今次既奧入瀨溪流旅程都到尾聲，本來計劃行到去「子之口」，亦即係十和回湖湖邊，見時間唔多都係唔行啦，冇理由跑過去既，都係搭巴士過去就算


左邊係十和田湖方向右邊係青森方向，好多人排隊返青森




成功上到車，要坐走廊爭啲就上唔到，好好彩


好快就去到「子之口」，最初既計劃係行到呢道再搭巴士去總站「休屋」，不過如果而家繼續搭去總站相信唔夠時間返轉頭，所以都係算啦，係呢道睇一睇十和田湖已經滿足啦




十和田湖好大，可以坐船慢慢欣賞，我當然冇呢個時間，係湖邊睇下就夠






三點既船準備開出，好多乘客




紅葉襯托之下十和田湖顯得特別靚




有餐廳亦都有商店，終於係呢道買到Postcard，得閒可以慢慢寫


睇返巴士時間表差唔多會有車到，我都返去車站排定隊等上車，已經有職員舉牌請返青森既乘客排隊




同十和田湖相處既時間唔多，準備講再見啦




計劃係搭由休屋開出尾二既班次，15:13會經過呢道返青森，係差唔多時間職員直接係呢度道開左部特別班次巴士，我都好順利上到車；之前都有諗過搭尾班巴士出青森都得，咁就可以多一個鐘時間慢慢行，不過怕有啲咩事上唔到車咁就大鑊，我唔想今晚被困係奧入瀨溪流




巴士沿奧入瀨溪流行，見返好多頭先行過既地方






好多人係石戶上車


巴士經過青森市區先醒起，原來我冇入過市區行街


坐左足足三個鐘，終於返到黎青森站


天氣預報話聽日會落雨，好彩揀岩時間今日去奧入瀨溪流；由一開始計劃去奧入瀨溪流睇紅葉時其實唔係揀今日，後來見今年紅葉時間特別遲所以將啲行程調黎調去，最後就調到今日出發，真係好幸運


紅葉情報顯示奧入瀨溪流已經係見頃


拎返背囊又要起程，先坐火車去「新青森站」






新青森站好大，好多手信鋪，行到差唔多時間就去等車








今次坐東北新幹線「E5系隼號」，係第一次坐架




我班車到啦，呢班車比較多站停，去「仙台站」要1小時45分鐘




坐中第一行面壁位，呢個幾鐘都要對住幅牆，好彩部車好舒服，一路玩下電話時間過得好快




話咁快行左三百幾公里路程黎到仙台，旁邊有部E2系新幹線




我坐既E5係盛岡站唔經唔覺就同E6駁埋左一齊，佢地一齊返東京啦


仙台站好大，好多日都未見過咁多人




仙台話晒係東北最大城市，車站人多車多，如果唔講都估唔到呢道係東北地方




穿過熱鬧既商店街，向今晚住既地方行去




今晚係仙台住呢間膠囊酒店


每人都有一個大locker，入面有衫有毛巾提供，洗手間同埋浴室都好多好大




訓既地方都好乾淨好舒服，床比想像中大，全晚都好好訓




放低啲野搞得黎都十點半，要快啲出去食晚餐；本來諗過食仙台好出名既牛舌，不過懶搵，行出街見到附近有牛肉飯食就入左去食，想快啲食完快啲返去沖涼訓教，因為聽日又要早起身


今日奧入瀨溪流旅程順利完成，奧入瀨溪流真係一個好靚既地方，就算路途有啲遙遠，我都覺得非常值得去，係入面完全比七彩繽紛既自然世界包圍，再配上清澈流水，絕對係人間仙境，好慶幸可以係一個咁好既天氣咁好既時間黎到，今次東北旅程真係冇去錯；聽日將會繼續東北旅程，去更多唔同既東北地方