東北紅葉。宮城。松島海岸・山形。山寺

< 日本東北紅葉之旅 >

第六天

匆匆黎到仙台一晚，逗留唔夠十二個鐘就要起程，今日會出發去遠離市區既地方，首先會去日本三景之一既「松島」，下午會去位於山形縣既「山寺」；今日又要去唔同既縣，所以七點幾就出發開始今日旅程

朝早出到黎見到條街濕立立又落住雨，睇黎今日天氣唔太好，不過都唔緊要既，今日會離開仙台市區，希望一陣天氣會好啲啦；快步穿過商店街去返仙台站






咁早仙台站唔係好多人


去到「仙石線」月台等車，月台係地底就好似搭地鐵一樣，頭先蠢左原來佢有一個站更加近商店街，我行多左少少路行到黎仙台站先上車；如果好似我咁又去松島又去山寺有張pass係會平啲啲，不過平得個小小我唔晒時間去買啦，直接用西瓜卡入閘就算


等車時快手食個頭先買既炸熱狗當早餐


仙石線列車超過半個鐘先一班，我睇岩時間去搭唔洗等好耐就有車到


四十分鐘車程黎到「松島海岸站」，係車站望出去都感覺到情況不妙，出面落既雨仲大過仙台市區；講真我對松島呢道興趣不大，不過佢係日本三景咁出名，而且我都唔知道幾時有機會再返黎宮城縣呢頭，所以今次都係黎左先算


望住啲咁既天氣其實冇咩心機，只係既然黎到都要照行架啦




松島可以算係一個欣賞紅葉既好地方，不過時間未到樹葉仲未變紅




松島由二百幾個小島組成，最靚係由高山睇落黎，舒服啲可以坐船欣賞，今次我就冇機會上山睇啦，亦都唔會坐船；係岸邊望出去因為天氣唔好視野唔太遠








好多美食車




碼頭邊有幾個小島，島上有「五大堂」，可以過橋上島參觀






橋下邊就係海水，有啲驚跌野落去




島好細，上面主要就係一座建築物，好多人上到黎參觀；由呢道望出去風景都算開陽，只係個天好灰暗












行遠少少有另一條橋去一個大啲既島「福浦島」，由一條長既橋連接，過橋費用￥200，既然都黎到一於過去睇下






係橋中間完全感受到咩叫橫風橫下，大風到連個人都企唔穩，開住遮都係一樣濕晒




福浦島唔算好大，係地圖上面見到有觀景台，咁就決定行去睇一睇


島中間有間小餐廳，相信今日冇咩人幫襯，咁既天氣邊有人會想黎呢道


好天既時候風景都幾好


開頭路都幾好行，行行下條路有積水，要好小心行過去








終於去到觀景台




望出去見到一個一個小島都幾有趣，今次任務完成，睇完之後我既感覺係好想快啲走








即刻行返原路返轉頭過橋走，松島要睇既地方都睇左啦，成功到此一遊






沿海邊行返去火車站




比預期既時間早走，未咁快有車到，咁岩又見到有「國寶瑞巖寺」既牌，順路入去望望啦






入左門口之後見到好多石雕




環境設計得好靚


最後去到大門口要收費入場，我冇時間當然唔會入去睇啦；呢道都係觀賞紅葉既好地方，見啲樹開始有少少變色，相信遲啲黎到睇紅葉一定會好靚


行返去火車站個邊出口走lu


旁邊「円通寺」大部份樹葉都係未變色








松島係出產蠔既地方，有好多餐廳賣蠔，可惜我唔食海鮮所以唔會引誘到我，哈哈




返到黎JR站等車返仙台，再見松島；個背囊就算有防水罩都濕到入去，有啲後悔冇放低佢係火車站






返到仙台站，而家四圍都好多人，係便利店買少少野食又返去等車


今次搭「仙山線」去山形方向，仙山線成個鐘先有一班車，睇清楚時間先去等


列車唔係好多人，上到車拎個飯團出黎食，又睇下風景時間過得好快


列車去到山區之後窗外景色變得靚好多，成個山都好有秋天氣息，一路睇住風景唔會覺得悶










大約一個鐘車程去到位於山形縣既「山寺站」落車




係月台上都可以望到一陣要去既山寺，就係小山丘上面




自助出入冇人睇住


係站入面就有好多locker，今次放低個大背囊先上山




山寺站




車站對出有餐廳有商店，最有印象就係呢間寫最可以免費存放行李，已經放左背囊入locker唔可以幫襯佢lu




跟着指示牌行去山寺方向




山腳都有一條比較熱鬧既商店街


山寺既呢個好出名，好多鋪頭都有得賣，我都買左一串試試，比我既感覺係唔知咩黎，唔鐘意呢種味道




正式開始上山


山腳都有唔同既寺廟參拜








到呢個位正式上山，￥300入場費






唔知呢道既馬嬲會唔會搶野食呢？


山寺係山形縣其中一個熱門觀賞紅葉既地方，今年既紅葉遲左變紅所以我對呢道既紅葉唔會有咩期望，而家好多地方仲係綠油油一片




由山腳去到山上寺廟有一千級樓梯，每行一級象徵少一樣煩惱，要努力行上去








中途會有一啲小景點比大家參觀




算係見到少少紅葉




大家都好努力向上行








上到山上「奧之院」用左大約半個鐘，慢慢行唔算行得辛苦






建築物都係睇下就算，我比較想睇紅葉睇風景多啲




山寺除左紅葉出名之外，由山上望去山腳一樣都係好靚，可以望到深山入邊既小村莊，又可以望到高山上面七彩繽紛既秋色，呢個環境感覺好舒服好自然，就好似童話世界入面一啲與世隔絕既深山小村莊一樣，好鍾意呢種風景






最靚既影相位相信就係上面呢座小寺廟位置，唔會又樹阻住，不過佢封左唔比人行出去影相...


係綠色之中出現一棵紅一棵橙既樹，佢地咁靚當然唔可以放過








一路影相一路行落山






行條山路仔落山，有趣過行樓梯級




貓貓！


返到山腳啦，可以見到頭先落車既火車站，而家要行返過去等車










要等多陣先有車，入候車室慢慢等




山寺再見


繼續坐仙山線去「山形站」，廿零分鐘車程就到




山形站都係一個比較大型既車站，有野食有野行，我想去酒店放低啲野先暫時唔特別行






啲串燒行過都覺得好香


勁大間鋪頭，完全係設計比人揸車黎買野


今晚我住既酒店距離JR站算係有少少遠，行過去大約要十五分鐘，我覺得呢個路程都OK既




間房感覺唔錯，有枱比我寫野，最重要係張床訓得好舒服，仲可以比我訓係道睇電視




酒店有個小小浴池可以浸，呢兩晚我都有落黎浸一浸


好多日都未試過咁早返到酒店，一到酒店房就唔想郁，休息左半個鐘之後終於再出發，去左行商場，目標係去animate行行，成功買到野，哈哈


買完野就想搵地方食晚餐，難得有日可以咁悠閒搵地方食野，一早都知山形縣米澤牛好出名，四圍搵有冇得食但好似唔覺有，最後都係放棄左...記得頭先係山形站見到有間炸豬扒店好吸引，就決定行返去山形站食佢啦






金華豚感覺上係招牌菜，咁就食佢啦


寫明用山形縣米，而且飯、湯、菜好似係寫住任食，見到都流口水，今日只係食左炸熱狗同飯團，好想坐定定食返餐飯


環境好舒服，豬扒黎之前用芝麻自製豬扒醬汁


黎到啦！睇個樣都知道好食




仲加多左碗飯同菜，呢餐食得好開心


今晚好好天，又可以見到大大個月亮




溫度好舒服，希望聽日好天啦


今晚仲有另一個節目，就係12點睇刀劍神域！等左今集好耐！可以訓係道睇好正！本來一點仲有另一套想睇，太眼訓都係挨唔到咁耐，十二點半就訓左


今日由宮城去到山形，松島遇上唔好天氣，景色大打折扣，好彩本身都冇咩期望，叫做去過就算；相比海邊風景，我更鐘意山景田園風景，所以好鐘意山寺，欣賞到咁靚既自然景色今日都係一樣咁滿足