東北紅葉。山形。藏王山登山

< 日本東北紅葉之旅 >

第七天

經過琴日大雨經歷之後，一早起身就見到藍天白雲心情特別好；黎到山形最重要既目的就係去藏王山，好想可以舒舒服服行下山，雖然冬天既藏王山又可以滑雪又可以睇樹冰好似更加吸引，但我相信秋天都一樣可以好靚



今日係今次旅程唯一一日唔洗搬酒店，咩都唔洗執輕輕鬆鬆出發真係好，仲有藍天陪伴


我都唔知行山要行幾耐，都係早啲出發穩陣，七點半就黎到山形站




右面山寺琴日已經去左，今日會去左邊御釜


巴士站旁邊見到有案內所就入去睇下，見到呢張卷岩用，¥3000包來回巴士同兩程纜車可以慳到少少錢，咁就買佢啦




巴士準時到，咁早其實冇咩人搭車




又到早餐時間，今日都係食三文治


接近藏王山巴士越行越高，風景都特別開揚，呢邊既藍天白雲真係好靚


但另一邊山既天氣就...心諗今次大鑊，呢邊咁多雲既！


大約50分鐘車程去到藏王溫泉站






呢道又可以感受到秋天氣息；藏王山紅葉季節其實已經過左，而家只係得返下面藏王溫泉可以睇到紅葉，山上已經唔會睇到




一路行一路望住座山，山頂咁既樣唔好話行山，連睇唔睇到野都成問題，不過一場黎到點都要上左去先算




四圍都有紅葉黃葉






就算唔住溫泉旅館，呢道都有好多日歸溫泉可以浸，晏啲落返山我都諗住浸一浸


藏王有幾條纜車線去唔同地方，今次我會搭可以上到最高既呢條，由「山麓線」「山頂線」兩條線組成




山頂只有1度


由「藏王山麓站」出發




啲樹冰好靚丫


纜車站望出去可以見到唔同顏色




大家迫上部纜車出發






係山腳既時候可以見到樹葉有唔同顏色，越上得高色彩越來越少，咁開揚既風景就算冇顏色都係好靚






藏王溫泉區係山中間


可以望到好遠既城市


去到「樹冰高原站」再轉纜車




呢道既樹葉已經落左大部份


今次上山既纜車細部啲




纜車開出左冇幾耐已經知道大鑊，前面大霧到咩都見唔到，山頂既情況唔樂觀






大霧到咩都唔係幾睇到






上到山頂站又大風又凍，要着返件風褸先可以出去；山頂能見度好低，基本上係望唔到風景，只可以睇啲近既野








點都要黎睇下藏王山既地標地藏尊




睇完地藏就要諗之後點算啦，咁既天氣行唔行山好呢？諗左一陣再望下條山路，見到條路都幾清晰，咁都係行左先算，今日既行山旅程正式出發；一開始有三位Auntie係我前面，好快就比我爬左頭，係山上又凍又大風，風力係3號風球以上，行快啲人都暖啲


一開始既山路算係好靚好易行，可惜既係今日睇唔到風景，唔知好天既風景係唔係好靚呢？








久唔久就會遇到有人迎面而過，好快又會消失係大霧之中，最少比我知道好多人而家都一樣係山上行緊


行到去山脊地方特別大風，沿路會有一啲木柱同埋圓圈標誌指示大家，google map定位都好準，正常唔會行錯路








行行下見到有個位寫住「近道」，係Google Map見到呢個方向係去「熊野岳」，但向上睇咁大霧咩都見唔到，而且呢個方向望上去只係得一對碎石唔似係一條路，諗諗下都係決定唔行上去，繼續沿住條大路行




繼續跟住啲木條行，見指示牌前面又係寫住熊野岳，我諗行前邊都唔會行錯






行到去一個四條山路交界位，好多人都係呢個位休息同埋影相





唔知點解佢地個個都會摸下呢舊石呢？




有時候會有風吹散啲霧露出藍天，本來對睇御釜已經冇期望，而家好似又多返少少希望可以睇到




交界位旁邊有間避難小屋，出面咁大風入去休息下都唔錯






避難小屋入面已經有其他人係道休息食野，我都係呢道食開餐先，今次帶左腐皮壽司上黎，一拎出黎已經覺得後悔，啲腐皮壽司流晒啲汁出黎，好彩膠袋冇穿......


大家係小屋入面傾下計，佢地好好奇點解會有個香港人一個人黎到咁遠既地方行山，又好羨慕我去左咁多東北地方睇紅葉，仲請我食左好多野，好多謝佢地


小屋入面既設施好簡陋，最重要都係可以比人緊急避難用，而且係好乾淨冇臭味










斷左線既電話可以點打呢？


去左宮城縣？


休息左一陣繼續旅程，一出黎見到小小藍天，睇御釜既希望又大左




藍天過後回復大霧，繼續向御釜方向行，呢段係今次最難行既山路，係非常斜既碎石路，要一步一步好小心行落去




見到小小御釜！


講真如果真係有事要跑返上去避難小屋避難，我諗未跑到上去已經暈低左




係山邊等左陣，突然一陣風吹開大霧，御釜清清楚楚係我面前出現！湖水好翠綠！今次既目標達成！Yeah！




如果再向前行好快就會行去到御釜呢邊既巴士站，可以搭車返藏王溫泉，不過呢邊一日得一班巴士，萬一多人上唔到車都唔知點算，而且我又未行上熊野岳，都係決定行返轉得搭纜車比較好，仲有頭先係小屋識既秋山先生都會一齊行返上去


係避難小屋交界位轉向熊野岳方向行去，條路沿山脊位慢慢上好易行，中途又多左位美國人一齊行




順利行到藏王連峰最高峰，海拔1841米既熊野岳山頂，呢道非常之熱鬧，有間小神社同小屋






好多人係小屋休息




係山頂影完相就跟住秋山先生行落山，前面都係咁大霧，好在條山路鋪得非常明顯，跟住行就應該冇問題？






一路落山行得好開心，行左大約10分鐘拎Google Map出黎睇一睇，發覺唔岩方向？！即刻叫停秋山先生一齊研究一下，原來我地真係行錯左路！呢條路行到天黑都唔會落到山！所以要行返轉頭上返熊野岳




落山就開心，突然又要行返上山，好彩唔係行左好遠咋


上返黎睇清楚個方向先行，今次要行既落山路其實唔係一條明顯既山路，係一堆大石，不過一路會有白色既圓形標記話比大家知方向，雖然望唔到好遠，但望住啲圓圈行應該就冇問題






一路落山，最後終於行返到寫住「近道」呢個位，即係今朝經過既位置，咁而家我識路啦




一路行一路傾計，大家一齊行返去纜車站


大家黎到地藏尊面前影張合照，結束今次既行山旅程，再見


返到黎先一點半，今日除左藏王呢道已經冇其他行程，可以比我慢慢Hea一下；上左纜車站上面望望，咁大霧當然咩都見唔到






有時候望得遠少少


好天既時候係可以望到好遠架


戀人之聖地？咁都有關係？


見到纜車站機房


纜車站入面有間餐廳，我都係道Hea下先


一路食雪糕一路望住個窗，有時候啲霧吹散左就可以望到下面

Hea到兩點幾坐返纜車落山




半山呢道係一個滑雪場


再轉纜車繼續落山




見到對面山另一部纜車運作緊








返到落黎呢個七彩繽紛世界






黎到藏王溫泉當然要浸一浸，去返溫泉街個邊




我要浸既溫泉係溫泉街最上面位置，又要行上山啦；啲流水都熱到出現煙，沿路散發出一陣臭雞蛋味，呢道既溫泉一定係真材實料






溫泉源頭既足湯


見到有細細間既溫泉可以浸，但佢真係好細間唔知有冇人會浸既呢？




流出黎既水都係散發住溫泉味道


一路欣賞秋天風景一路行上山，條路比想像中斜，感覺仲辛苦過今朝行山，就快行到出汗，好在一陣有溫泉浸唔理得咁多，辛苦啲都唔緊要










係山中間既溫泉小鎮感覺好寧靜好舒服


繼續努力行上山，我終於明白點解呢個溫泉冬天係唔會開，條路咁斜又結晒冰我諗就算行到上去都落唔返黎










呢邊都有滑雪場，全個藏王山有唔同既滑雪道，呢道真係滑雪天堂






行左大約20分鐘終於黎到今次浸既溫泉「大露天風呂」


呢個溫泉超天然超正，溫泉就係一個小山谷之間，一路浸住溫泉一路感受住秋天景色，呢種咁天然既感覺唔係普通溫泉旅館可以比到，而且啲水仲係最天然，直接係山上流入溫泉，呢個溫泉可以比一百分；唯一有個麻煩少少既地方就係呢啲天然溫泉係冇正式既沖身設施，只可以簡單用水沖一沖，所以出到黎個身係會keep住一陣臭雞蛋味；溫泉就唔可以影相啦，佢既網站好多靚相；浸完溫泉出黎飲枝奶，好開心咁行返落山，哈哈
http://www.jupeer-zao.com/roten/

落返山已經五點幾，天黑左好多，係時候行去巴士站






個BB訓得好得意


時間岩岩好，等左幾分鐘就可以上車，出發返去山形市


今晚簡簡單單食個牛肉飯就算


時間仲好早去超級市場行下


夜晚冇乜野好行，八點半就返左酒店，可以寫下postcard，日本既郵票特別靚


今日藏王山上雖然咁大霧睇唔到風景，不過可以係霧入面行山都係一個非常特別既體驗，但係其實岩岩開始行既時候一直都唔知前路係點，又唔知要行幾耐又唔知會去左咩地方，心入邊都係會有啲擔心，一路行一路見到有人迎面而過，又知道有人係後面跟住我既時候其實安心左好多，最少知道呢座山上面唔係得自己一個，最後非常開心完成到今次既目標，順利睇到御釜；山又行左又可以浸到一個咁靚既溫泉，今日既旅程非常完美