東北紅葉。宮城。鳴子峽

< 日本東北紅葉之旅 >

第八天

係山形停留短短兩日又再出發，今晚目的地係會津若松，中途會經過一個好出名既紅葉景點「嗚子峽」，睇紅葉預告呢個時間嗚子峽係紅葉見傾日子，相信一陣會見到好靚既紅葉景色


今日山形天氣冇琴日咁好，成個天都係雲，嗚子峽距離山形有啲遠希望唔會有太大影響


去到山形站上車




今次會搭E3系山形新幹線去總站「新庄站」






山形新幹線屬於迷你新幹線，會同在來線共用路軌，速度唔會行得好快，當然新幹線會舒服啲，而且用pass又唔洗比錢當然坐新幹線


我搭既新幹線由東京黎到，不過佢遲左少少






九點鐘乘客唔係多，坐上黎舒舒服服食早餐




由山形去新庄差唔多一個鐘車程，一路望住窗外田園風景時間過得好快，只係一路坐一路覺得唔對路，部車越行越慢，坐左一陣已經比預定時間delay超過10分鐘，但我一陣係新庄站只係得6分鐘轉車，如果轉唔到車就要等多成個半鐘...唯有希望部車行快啲啦






去到新庄站既時候已經過左另一班車開車時間，預左冇希望上到車，不過都快啲行去另一個月台睇下，又好好彩去鳴子峽既火車等緊我地呢班新幹線既乘客仲未開出，最後順利上到車啦；好在呢班車等埋我，而且新庄站好細就咁係月台就可以行過去在來線


今次坐「陸羽東線」去「鳴子溫泉站」，車程大約一個鐘，呢班車乘客都係唔多


列車經過既地方都係好靚既山景田園風景，有時候坐低靜靜欣賞風景，有時候係車廂入面走來走去睇風景，呢程車時間過得真係好快










去到「中山平溫泉站」，呢道坐巴士去鳴子峽仲近，不過我想由火車上面睇睇鳴子峽所以就坐多一個站；呢個站突然好多老人家上車




火車通過鳴子峽啦！列車速度減慢方便比人欣賞風景，亦都方便比人影火車，見到天橋上面企滿人






係火車上面都可以感受到鳴子峽有幾咁靚，一陣可以直接感受得到


又返到宮城縣，係「鳴子溫泉站」落車，今次轉車時間只係得7分鐘，不過呢個站超多老人家落車，一路係佢地後面慢慢行，去到巴士站既時候第一部巴士已經開出，另一部巴士又迫滿人想上都上唔到，所以都係放棄...






鳴子峽係紅葉時間會有特別班次巴士，班次唔多走左呢部之後要等一個鐘先有下一班車


既然而家都唔趕時間咁慢慢都未遲啦，想放低個背囊不過車站locker已經滿晒，去問問觀光中心職員邊道仲有locker，佢帶左我去上一層一間房放低背囊，只要係五點半之前返黎拎就可以，而且係免費


車站裏面同埋出面




鳴子娃娃




車站出面有兩個小足湯




有時間就四圍行下，順便換定一陣要搭既火車飛，順路去郵局買明信片




鳴子娃娃無處不在


早啲去排隊等巴士，唔想又上唔到車


去到鳴子峽啦！路口有一大排小食攤檔






全個鳴子峽都充滿秋天氣息




商店更加充滿人氣






鳴子峽最常見既天橋風景




好多人迫晒係前面唔知有咩睇呢？


原來呢個位可以睇到下面火車路，咁岩又有火車經過，不過只係望到車頂




大家都係迫晒係啲影相位同埋商店，其他地方其實唔多人


又見到條橋啦，但開始多雲




去到天橋上面可以睇到鳴子峽峽谷風景，有風吹過仲可以見到峽谷入邊飄滿金黃色樹葉，好靚架








天橋上一早已經迫滿人，大家都霸定個好位影火車，等等下仲開始落雨，但大家都冇意欲離開，最後火車終於出黎穿過金色世界






睇完火車又行返去另一邊，落完雨仲見到彩虹






有路可以行落去峽谷下面，一於落去睇睇




由下面望返上去




峽谷下面係河水，係谷底可以感受到全個世界都比紅葉包圍












橋就係頭頂上面


以前係可以係谷底沿河邊行，不過後來地震之後條路受到破壞，而家只可以落谷底睇一睇唔可以行啦，真係好可惜




一路享受秋天風景，慢慢行返上去






又出太陽又落雨既感覺好奇怪，上返黎又再次見到彩虹




時間唔多唔四圍行出去啦，留係附近繼續行下就算




又見到呢個


天橋又迫滿人準備等下一班火車到




係天橋上面可以望到頭先谷底行過既地方，上面睇落去啲人好細粒




終於可以見返藍天，全個鳴子峽七彩繽紛非常之靚，超鍾意呢道










又再次見到彩虹！係呢道總共見到四次彩虹咁多，真係好幸運！


為左唔好上唔到巴士，都係早啲行去等車比較好，巴士站已經有好多人早我一步排隊




巴士黎到順利上到車，去返鳴子溫泉站


攞返背囊等一陣都差唔多時間要去等火車






一年四季都有唔同風景，秋天係最色彩繽紛


火車到啦，呢部係特別列車，多數日子星期六日先得一班，咁岩頭先換飛個時仲有位比我換到，可以搭佢走lu




本身呢部列車啲位係好舒服，不過我換到個張飛係後面綠色呢卡臨時列車，要坐呢啲又迫又直既木凳好難會坐得舒服




好彩有個行李位比我放背囊，可以坐得舒服啲欣賞風景


列車係田中間穿過，左右都係好靚既田園風景




呢部車本來可以坐到返仙台，不過係「古川站」轉新幹線會更快到仙台，所以就係呢個站落車


古川站掛左好多呢啲裝飾




車到啦，上車搵位既時候有奇怪既事發生，我個位有人坐左既？唔知發生咩事，不過都係唔理咁多，十幾分鐘車程咁短行去門口企一陣就到




係仙台落車，下一班就係經「郡山站」既車，不過奇怪既事又再發生，又有人坐左我個位？行開望多次張飛，車箱同個位都冇錯，咩事呢？？！再望多陣先留意到發生咩事，我揸住既呢張飛係聽日！為左唔想比車掌捉即刻跳返出車，我都唔肯定新幹線有冇企位呢回事...呢兩張飛係頭先係鳴子溫泉個時換，唔小心冇留意個日子......


下一班去郡山既車未咁快開，落去便利店買小小野食再上返車


今次呢班車由仙台開出，又有自由席好多位可以坐


遲黎既下午茶


去到郡山站要轉在來線列車


呢次旅程不停見到呢張超可愛既秋田犬poster，今次總算去過秋田


郡山站咁熱鬧


今次坐「磐越西線」去「會津若松站」，由總站坐到總站車程要個幾鐘，夜媽媽冇野睇，一路上下網好快就去到，不過經過一啲荒山野嶺地方有時候係會收唔到訊號




夜晚火車冇咩人


差唔多八點半去到今日目的地，位於福島縣既會津若松，比預期遲左少少，如果今日唔係換錯新幹線飛既話會早一個鐘到




今晚住既酒店就係火車站右邊，一出黎就望到，聽朝要好早上火車，所以要揀間方便啲既酒店




都係細細間既酒店房，對我來講已經好舒服；不過今次我明明係book左禁煙房，check-in個時話冇晒只有吸煙房，咁都要住架啦，好彩呢間房冇咩煙味，青森嗰間房就勁大煙味




住呢道包左免費浸溫泉同埋免費飲品，飲品就冇時間飲啦，襯溫泉未關門快啲去浸一浸


溫泉行五分鐘就到，入面有唔同既池可以揀，今日坐左咁耐車可以舒舒服服休息一下




又見到大大個月亮係頭頂




聽朝五點幾就要出發，今晚先去7-11買定聽日早餐


仲有就係買埋今晚晚餐返酒店慢慢食


今日見到七彩繽紛既鳴子峽真係超級開心，放眼望出去全個都係秋天世界，除左靚之外都唔知可以點形容，仲要好幸運可以見到咁多次彩虹，今日過左開心完美既一日；聽日會去今次紅葉旅程最後既紅葉景點，期待聽日都一樣可以睇到靚風景