2021年12月25日星期六

日本17天鐵路之旅。五能線篇

~祝大家聖誕節快樂~
~為左唔好爛尾咁耐等我努力完成埋今次旅程~

< 日本十七天鐵路之旅 >
< 五能線篇 >

第十四天

今日會乘搭五能線列車,列車會沿日本海海邊行駛,穿過唔同小鄉鎮連接秋田青森,係其中一條我一直都好想坐到既鐵路,今次終於有機會黎到啦


 

又再次黎到青森站,五能線觀光列車來往青森同秋田,我揀係青森上車係因為時間易就啲,而且青森熟路啲

 五能線有觀光列車「Resort白神號」行駛,當中有3部列車,今朝搭既呢部係「くまげら」,座位坐得好舒服,窗口又大睇風景好正


青森縣好多地方都係農田,當然成日都會見列青森最出名既蘋果樹




列車上有三味線表演,好多人行去車頭睇,可惜我唔係坐車頭而且又冇咩興趣,望兩望就行返去後面繼續望窗外風景


終於出到海邊啦


去到千畳站有十零分鐘時間比大家落車,基本上大部份人都會落去,車站就係海邊,可以行出海邊望住大海,仲有一啲一啲特別既岩石,亦有商店比人買下野





都差唔多開車既時候列車會響安提醒大家上車,大家亦都會好乖咁快啲上返車繼續去下一站


繼續沿着海邊行見到好多唔同岩石風景
  

去到深浦站又可以落車,不過呢度冇咩睇,純粹見到對面列車過黎,呢個站亦都有職員上車賣當地特產,呢道近海邊當然好多海鮮野賣



路過一啲小鎮




去到「十二湖站」正式落車,其實已經住左三個幾鐘車,但對住靚景完全唔覺辛苦;呢道有巴士開去十二湖,算係五能線其中一個大景點,好多人都係呢道落車



巴士一路行都可以見到好靚既湖光山色,一路坐到去總站落車,由呢道行去十二湖之中最出名既「青池」好近




十二湖風景好靚,一路行就可以感受到大自然氣息,呢個時間應該唔係旺季所以遊客唔多,行得好舒服




好快就行到十二湖裏面最出名既「青池」,係一個藍色小池塘,不過講真青池雖然係靚,係唔岩時間之下就咁睇只係一個小水池,如果把住好大期望山長水遠黎睇既話相信會有啲失望



除左池邊既大路,仲有一啲小路可以行入山入面,不過得我一個人驚驚地唔敢行入去,都係行返湖邊既大路睇下唔同既池塘算,當然其實無論行去邊,周圍行周圍睇都係咁靚





行到夠鐘就搭巴士走,直接搭去下一個目的地「不老不死溫泉」,呢個溫泉好多年前睇過介紹之後已經好想去,當時仲覺得呢個地方咁遙遠交通又唔方便相信都冇咩機會黎到,估唔到今日真係黎到

露天溫泉係正海邊,可以望住大海浸溫泉;溫泉有兩個,一個係男女混浴,一個係女湯,當然正常我諗冇女士會入去男女混浴掛?呢個溫泉好開楊,可以就咁係出面行入去唔洗經酒店,又冇圍欄,浸浸下有人走左入黎影相,好在溫泉水係黃色咩都見唔到;係呢道估唔到遇到兩位香港人,仲一齊浸溫泉,可惜佢地要趕車返青森浸左唔係好耐就趕住走,不過我都好怕曬住太陽浸溫泉,我都唔係浸左好耐


溫泉對正西面大海,黃昏可以一路浸一路睇日落,只可惜我要趕住搭車走未到日落就要離開,如果係呢道住返晚就可以浸住溫泉睇日落

浸完溫泉望住個太陽等車走,酒店指定時間有免費穿梭巴士到JR站


去到「ウェスパ椿山站」






今次坐「Resort白神號」另一部列車「橅」向秋田站出發,呢部車啲位都係咁舒服,仲有小賣部


車上睇下風景,又睇到日落,睇到天黑之後就咩都睇唔到安心坐返係自己位等落車



到達秋田站,5個鐘既五能線旅程完成,算係完成左其中一個小小願望;到秋田後冇時間四圍行,好快就要轉坐秋田新幹線去盛岡,兩次黎到秋田縣都冇機會行下秋田市...


盛岡冷麵早兩日食過,今晚就食盛岡另一款都係好出名既炸醬麵,又平又好食

餃子都好食

有說明教大家點食

可惜最後呢個湯落得太多調味料,比我搞到唔知想點…

食飽之後行返去今晚坐既酒店,酒店係盛岡站西面,附近基本上咩都冇,連便利店都唔多覺有

成十一點先去到酒店,第二朝一早就要出發,繼續最後一日鐵路旅程


6 則留言:

  1. 回覆
    1. 多謝提醒,太耐冇用原來放相方法已經唔同左 @@

      刪除
    2. 而家應該可以睇到相片啦,多謝支持 :D

      刪除
  2. 文字睇到,但相片全部睇吾到﹗祝聖誕快樂﹗

    回覆刪除