黃山 (下篇)

< 杭州﹑黃山﹑婺源﹑安徽古鄉 7天夢幻之旅 >

第四天(續)

西海飯店真係太舒服啦，唔經唔覺就係道休息左個幾鐘；到出來既時候就出事啦，明明頭先入去時都算天氣唔錯，但出來既時候就超級大霧，個日落點算好呢？




唔理大唔大霧啦，都要出去行下，唔通咁遠來到周圍都唔去咩
但咁既天氣真係冇辦法，唯有近近地去飛來石望望；行大約5分鐘路過排雲樓，一陣會係呢道食晚餐


去到一個叫回音壁既到方，依然好大霧；每當有回音既地方就會有好多人大叫，但呢道就算叫幾人聲都唔覺有回音，唔通係呃人？




遠景就睇唔到啦，近近地都可以睇下路邊好靚既花；同行既朋友話如果春天來黃山既話路兩旁都會開滿好多好靚既花，就好似係花中間穿過一樣，今次睇來又揀錯時間來玩


慢慢行行左成個鐘，終於去到飛來石








望望下又真係幾似由天上飛落黎既石頭，又會無啦啦多左舊咁既石，好奇怪




睇完就要返轉頭食飯，因為好早6點就開飯，遲左就咩都冇得食




黃山山上既物資同食物都好貴，因為要靠挑夫一步步挑上去，望見都覺得辛苦，而且供應唔多；如果係我自己去既話，我就唔會係山上食野LU，因為真係好好好貴，我會自己帶乾糧﹑杯麵上去食，都係一日咁多冇咩所謂，又可以慳返好多錢；不過今次人多就可以大家share食好少少，我地早一晚已經係阿拉酒店預訂左一圍排雲樓8人團餐，每圍640蚊，不過我地7個人所以每人就貴少少；呢餐雖然唔可以話好好食，但又未去到難食既程度，行左一日山，又攰又凍既時候可以食到咁多熱騰騰既飯餸其實係一件好幸福既事


食飽就返酒店休息，期待明天2點半起身睇日出

第五天

半夜2點半起身...其實只係訓左兩個鐘；由西海飯店去光明頂大約4公里路程，上升大約300米，正常個零鐘可以行到，不過都知道自己行得慢所以預多少少時間；訓醒打開窗望一望都知情況不妙，出面大霧到咩都見唔到，打去酒店大堂問問今日睇日出既機會高唔高，佢話係55%，既然難得黎到，就算明知冇得睇都要上去搏一搏啦，朋友成日都講：「一世人黎一次咋！」最後食個杯麵，3點50分退房出發

全程都係超級大霧，就算開住電筒視線都唔夠2米，熄左電筒更加連自己手指都見唔到，而且霧水令到全身都不停滴水，真係第一次係咁惡劣環境行山；全條路都好靜好靜，除左我地5個人既聲音，就只有風聲﹑樹聲﹑水聲......完全冇人行呢條路；其實人地去光明頂睇日出會住係白雲賓館，行15分鐘就可以到山頂，可能係我地幾個先咁傻係呢邊慢慢行

不斷行行行...4點54分終於見到第一支路燈，心諗應該好快就到啦？以前係香港都行過唔少山，行毅行者時夜晚都行唔少，有時會遇上大霧，但同呢道比呢道真係惡劣好多，冇路標完全唔會知道行到去道，去到見到路燈先開始覺得係黑暗中望見一點曙光；自從見到第一支路燈後，條路平坦左好多，唔洗不斷上樓梯；最後5點10分終於行到上去光明頂


「光明頂是黃山主峰之一，海拔1860米，為黃山第二高峰，與天都峰、蓮花峰並稱黃山三大主峰。頂上平坦而高曠，可觀東海奇景、西海群峰，煉丹、天都、蓮花、玉屏、鰲魚諸峰盡收眼底。明代普門和尚曾在頂上創建大悲院，現在其遺址上建有黃山氣象站。因為這裡高曠開闊，日光照射久長，故名光明頂。由於地勢平坦，所以是黃山看日出、觀雲海的最佳地點之一。」

上到光明頂依然大霧，可能一早都預左唔會睇到日出，又冇特別失望；日出過後，太陽都唔知升到幾高啦，突然一陣強風將霧吹散，視野終於遠好多






有景睇，當然就要霸定個靚位慢慢欣賞






天都峰與蓮花峰




呢個時間又凍又大風又落雨，但我係唔會怕既


要離開啦...睇日出既話住呢道光明頂山莊最方便，行出來就可以睇到








黃山天氣變化好快，頭先仲係大霧落雨，而家望見遙遠的雲海


望見好遠既鰲魚峰，一陣將會經過


落山啦，再見光明頂










落山途中終於見到太陽啦


向下行好快就到白雲賓館，係道休息下食下野，等另外兩位冇睇日出既朋友


由山腳帶上來，傳說中既自熱飯盒


條腸係自己加上去既


個飯加熱既時候不斷噴煙，好誇張；盒飯都算可以用來充饑既


等埋另外2個朋友都到白雲賓館之後，我地繼續出發；四圍都有美景






經過鰲魚峰


回望光明頂，已在遙遠的他方




繼續落山






由山下看鰲魚峰








由後山上真係舒服好多，而家我地大多數都係落山路，但由前山上就相反，一落纜車就要面對超級多樓梯，見到都覺得腳軟


不斷向下行




抬轎好貴


不過免費比我都唔會比人抬，比人抬住行山路好得人驚


雖然落左好多樓梯，但如果上蓮花峰既話又要上返咁高，即係落幾多上幾多






蓮花峰既路上...






可以望到山下面既纜車站啦，不過未走得住，要先去玉屏峰






成條路都起係大石上面


玉屏峰後面就係天都峰，不過天都峰暫時封山保育，2015年再重開


離開蓮花峰lu




好快就去到玉屏峰，迎客松所在地






傳說中既迎客松




呢道人超多，好多好多旅行團係道，此地不且久留，盡快離開


黃山松四圍都有，唔一定要同人迫迎客松既，周圍都有好多好靚既松樹可以睇


除左迎客松仲有送客松，不過就唔出名又細棵所以好多人行過左唔會睇到




未有纜車以前，就要行呢D路上落山，都未行我見到就已經暈低啦




好彩而家有纜車，好快就去到山腳，不過就要犧牲80大元




黃山2日1夜行程好快就完啦，今次體會到黃山變幻莫測既天氣，亦到欣賞左好多奇松怪石，美中不足既係睇唔到日出日落美景...不過唔緊要啦，今次睇唔到咪下次囉，呢道睇唔到咪去第道囉，太陽唔會走左去既，將來總有機會可以欣賞到更多更靚既風景


↓ 黃山 (上篇) ↓
http://arho25.blogspot.hk/2013/09/blog-post_10.html

↓ 安徽古村。盧村 油菜花與木雕樓 ↓
http://arho25.blogspot.hk/2013/09/blog-post_18.html