紹興﹑西湖﹑太子灣公園

< 杭州﹑黃山﹑婺源﹑安徽古鄉 7天夢幻之旅 >

第二天

六點半起身準備開始第二日既旅程，因為今次成個trip都時間緊迫，所以都冇辦法啦要早出晚歸，玩得幾多得幾多，都唔知幾時再有機會再返來，雖然好多時旅行都係咁好似辛苦左少少，但我好享受每一個旅程~今日就係咁成為左全房最早起身既人

出發去火車站前問左hostel職員行去火車站要幾耐？職員答覆係行20分鐘就到...我都唔係好信架啦，成3公里路邊有可以20分鐘行得完，最後用左極速行都要行30分鐘先到，結論係20分鐘跟本冇可能行得完，其實搭巴士好快到，但行下當晨運都唔錯

好大既杭州火車站，杭州好多地方都興建緊地鐵，市中心好多地方都係地鐵地盤，暫時有種污煙瘴氣感覺，相信過多幾年起好左地鐵會好好多



預早左時間去火車站，見仲有時間，買個早餐上車慢慢歎
經常都係唔同地方見到「真功夫」，終於有幸可以食返一次~
上到車...我唔知係唔係同一等座有仇，次次坐一等座都係比個倒頭位我......


大約40分鐘就去到紹興站


無啦啦走到去紹興其實係有目的，今次係因為魯迅已來，我相信80後以上都會知道魯迅係邊個，中五會考其中一篇課文「孔乙己」就係出自魯迅作品《吶喊》
 

先坐車去魯迅故里


紹興街頭，每當有十字路口就會有呢D屋仔，作用係比揸電單車﹑踩單車既人係等過馬路時有一個遮蔭既地方，唔洗日曬雨淋，雖然周圍都有個咁既野係道就唔係咁好睇，但政府肯整個咁人性化既設施方便市民真係值得一鑽

紹興同杭州一樣，好多呢D自助租單車地方

好快就到左啦，參觀魯迅故里係免費既，用回鄉證就可以換領門票；魯迅故里分四大部份，包括魯迅祖居﹑魯迅故居﹑三味書屋和魯迅博物館

先參觀魯迅祖居

魯迅祖居的大廳，用來會見客人，招呼賓客

唔記得係咩地方啦~

主人書房

用來藏書既房間

幼主房間，有張比較高的凳，方便小朋友坐

儲物室，中間仲有個地牢

呢個廚房真係好好好大

出左魯迅祖居，向前行幾步就係三味書屋，三味書屋就係魯迅小時候讀書既地方


三味書屋既課室，魯迅就係坐最左邊個個自閉位





思仁堂係三味書屋既大廳，三味書屋係一間學校，同時都係老師既屋企，呢個大廳同祖魯迅居大廳一樣，都係用來招呼賓客


三味書屋既其他地方(有個伯伯坐係中間睇報紙，扮讀書人？)

魯迅博物館，入面有好多魯迅既介紹，包括魯迅既作品，魯迅係南京、日本、紹興等地既生平事迹，入左去之後保證可以對魯迅有更深入既認識，係呢道唔講咁多啦，掛住睇都冇點影相，如果對魯迅有興趣既呢道好值得參觀



出到門口就見到好出名既三奇臭豆腐，真係咁奇？要試下先知


其實我就食唔出有咩咁「奇」啦，呢種唔係香港既臭豆腐，唔臭，似係一件普通炸豆腐，不過都算好食，加D辣椒醬更正


最後參觀既地方--魯迅故居，魯迅就係係呢道出生﹑成長

魯迅既房間，當年魯迅係日本留學返到紹興就係住係呢道，第一篇文言文小說《懷舊》就係呢間小小既房間寫成



魯迅：「我家的後面有一個很大的園，相傳叫作百草園。其中似乎確鑿只有一些野草，但那時卻是我的樂園。」
百草園係魯迅屋企一個後院，用來種花種菜，但亦都係魯迅小時候最鐘意玩既地方
 

魯迅故里雖然唔大，但如果細心睇既話都要唔少既時間
出左魯迅故居就要繼續趕路，去一個我相信好多人都識既地「咸亨酒店」，係魯迅故里旁邊


「孔乙己是站著喝酒而穿長衫的唯一的人。他身材很高大；青白臉色，皺紋間時常夾些傷痕；一部亂蓬蓬的花白的鬍子。穿的雖然是長衫，可是又髒又破，似乎十多年沒有補，也沒有洗。他對人說話，總是滿口之乎者也，教人半懂不懂的。」


孔乙己：「溫兩碗酒，要一碟茴香豆。」呢個就係孔乙己夢寐以求既茴香豆


咸亨酒店入面既餐廳，本來都想試試，但係道食野有D麻煩，先要買儲值卡，再用儲值卡買野食，最後仲好似要退卡，見咁煩都係唔食啦......

離開咸亨酒店，行大約15分鐘，去到下一個目的地--倉橋直街


洗眼睛？是甚麼東東？

倉橋直街沿河而建，民居就住係河道同道路中間，每家後院都有一個小碼頭




紹興其中一間好好好出名既餐廳--狀元樓，但時間太緊迫冇時間食


求其搵個地方食少少野又一餐


紹興古稱會稽，春秋時期越國首都，亦係一個江南水鄉，小橋流水遍佈整個紹興市；古時紹興曾經有超過一千座橋，而家係倉橋直街呢道就有7座橋，寶珠橋係其中之一


但點解橋上面係寫光明橋既？


烏蓬船穿過小河，好有水鄉感覺






行到呢道要同紹興講再見啦，回程返杭州


坐上2:07既火車去杭州，50分鐘車程

到杭州火車站直接跳上Y2去太子灣公園
好多人去西湖都上左K7，K7既車連續不斷咁開都上唔晒人，反而Y2就冇咩人搭


去太子灣公園既路唔遠，但一出火車站冇耐就開始塞車，足足塞左個半鐘先落車，我相信行路去會比較快


呢個時間太子灣公園最靚就係鬱金香，鬱金香係香港比較難見到，因為鬱金香生長係較凍既地方，生根溫度大約2°C – 5°C，生長期大約13°C – 17°C，香港除左雪櫃都好難可以保持咁凍


紫色鬱金香：永遠的愛 / 無盡的愛 / 最愛
粉色鬱金香：美人 / 熱愛 / 幸福
黃色鬱金香：高貴 / 珍重 / 財富


紅色鬱金香：愛的表白 / 榮譽 / 祝福 / 喜悅
白色鬱金香：清純 / 純情 / 純潔






如果有齊晒以上咁多鬱金香就好啦
呢個時間太子灣公園真係好多人，多人到同行年宵差唔多，而且沿西湖邊馬路迫滿車，單車路就迫滿人，搭車踩單車都要一D時間

太子灣公園對出就係西湖蘇堤，如果要行過蘇堤都要唔少時間，蘇提大約有二千七百米長，踩單車就輕鬆得多


今日天氣唔係咁好，視野唔係咁清楚，所以都係一路行一路求其影幾張相就算啦












行到去蘇提另一邊已經開始天黑，要搭巴士返市區，但又有另一個問題出現啦，呢個唔係巴士總站，大家都係呢個站上車係好難迫得上...等左唔知幾多部先上到...杭州好多巴士都係呢款混合動力車，用電&汽油推動，當車慢行既時候會用電，好靜而且冇嘈音冇廢氣


再次返到高銀街食飯，今次揀左食紹興菜，但呢餐就冇之前個餐咁好食啦


冇肉既醬油鴨


東坡肉，雖然真係好肥，食一次半次應該冇問題既


呢個肉沫臭豆腐就真係頂唔順啦，冇呃人真係臭...同行朋友話同廁所既味道差唔多...


仲有冇汁既小籠包


食完再去河坊街買下野就返Hostel啦，今晚又做左全房最遲返到既人...
唔知係唔係杭州比較適合女仔去多D？同房另外四個室友都係女仔，而Hostel住既女比男都多好多，睇來杭州咁詩情畫意既地方都係唔係咁多男仔識欣賞......

第三天

今日全間房又係我地最早離開Hostel，大約九點check out，離開前影下間Hostel先，呢道好靚

上層係雙人房，下層係多人房






不過呢間Hostel消費唔平，係好好好貴，呢道食薯條要28蚊一份，我最鐘意既成都懶骨頭賣10蚊咋


既然咁近西湖，走之前再去望望；西湖再見

坐巴士去武林廣場，再轉巴士去杭州機場






黎到呢道杭州旅程完結啦，係機場迎接另外5位一齊去黃山既朋友，好快就可以開始今次旅程既重點，黃山水墨畫之旅


↓ 杭州﹑黃山﹑婺源﹑安徽古鄉 7天夢幻之旅 @ 2013 春 ↓
http://arho25.blogspot.hk/2013/09/2013.html

↓ 黃山 (上篇) ↓
http://arho25.blogspot.hk/2013/09/blog-post_10.html