黃山 (上篇)

 < 杭州﹑黃山﹑婺源﹑安徽古鄉 7天夢幻之旅 >

第三天(續)

由杭州去黃山要好幾個鐘車程，沿途風景好靚，有好多好靚既油菜花，由其浙江省境內油菜花特別靚特別多


已經去到安徽省，沿路都有油菜花




行左好遠路，又到午餐時間，去到一個叫歙縣既地方，第一次試地道安徽菜；今次都係我第一次去到安徽省，今次旅程有兩個第一次，除左第一次去到安徽省之外，仲有第一次到江西省，但仲有好多地方未去要再努力一下啦


下午2點40分去到午餐地方


毛豆腐﹑臭桂魚﹑野菜炒蛋等等係安徽菜色，但可能唔係太岩口味，呢D餸菜都唔岩我食...不過除左呢D之外，其他都唔錯


歙縣有個徽州古城；安徽古稱徽州，明清時期曾盛極一時，徽州商人就係係呢就做生意，賺到好多錢所以建立起繁盛既徽州




不過而家徽州古城變成一個小小既歙縣(個名我都唔識讀)




雖然古城係靚，但聽講商業味太重啦，全都係商店，所以都唔用百幾蚊入場貴去睇啦，繼續趕路去黃山；而家去邊都要收錢，仲下下都唔貴，都係麗江平遙好，咁大個古城都係免費，反而呢D小古城要收咁貴......


去黃山途中，遇見好靚既油菜花


今次正式同大片油菜花田有咁親密接觸，即刻要衝過去，嘩......


但花田入面有好多蜜蜂，唔敢入去玩


大約5點，終於去到位於黃山山腳湯口鎮阿拉酒店


湯口唔係好大，就一條直路貫穿成個鎮，但由湯口一邊行去另一邊既話會好遠，所以就揀左呢間位於轉乘中心既阿拉酒店，方便明天一早出發上山，而且仲平靚正


雙人房128人仔一晚，而且服務超好，好抵住


出面有超級市場可以買定上山物資(山上既野好貴都係買定比較好)，我地一大班人買左即食香腸﹑八寶粥﹑杯麵﹑仲有好正既自熱飯盒，而雨衣﹑鞋套呢D就可以係酒店買，如果係山上冇落雨冇用到既話可以拎返去其它貨品，唔會浪費，我就換左幾枝水，夠實用~


外出走走，見到好多人一拐一拐落山，心諗有冇咁誇張，行到腳都斷


阿 拉酒店仲一項幾特別既服務，每晚6時30分酒店都會係餐廳提供一個黃山攻略的講座，可以一路食飯一路聽，對上山真係好有幫助，有咩唔清楚仲可以即場問，唔 洗預先plan行程都得~今次去黃山有朋友預備好成個行程，我咩都唔洗準備，好耐都未試過去可以咁輕輕鬆鬆去玩~平時旅行大多數都係我plan，今次咩都 唔洗諗可以懶下啦~


餐廳飯餸都唔錯又唔貴，仲有我至愛番茄炒蛋


有黃山地圖派，唔同地方既距離﹑時間都寫得好清楚，簡單易明


夜晚出面都有野行，早D休息明天一早就要上山


第四天

6點30分就去到餐廳食一個簡簡單單既早餐，20蚊一位，知道山上都冇啖好食，所以要食得飽D先；7點正式出發，過左7點就可能會有大量旅行團，要排長龍先上到車，總之走得快好世界



由阿拉酒店行去轉乘中心大約5至10分鐘，去到就可以選擇坐車去前山或後山既纜車站，當然就緊係去後山啦，由後山上山比由前山上山輕鬆好多，一開始好多都係 平路，行得好舒服；相反前山上山既話一開如要行極多樓梯上山，望到都覺得辛苦，但見到好多旅行團都貪方便由前山上，包括香港旅行團都係，唔怪得D人話上黃山辛苦啦


上後山就要去雲谷寺索道站，車票19蚊


25分鐘車程，呢程車都唔平，係好貴，但唔搭又唔得......


雲谷寺索道站，有好多人早過我地到，但都尚算少人


纜車費單程80蚊，門票230，未上山已經要用幾百蚊


大約12分鐘到達山上蘑菇亭旁邊白鵝嶺站


一上到山，已經可以感受到水墨畫既感覺，每座山﹑每塊石造型都好特別，滿山松樹都有唔同姿態，只係睇山睇樹都好吸引














去到始信峰就可以見到好多好靚既黃山松，每棵松樹造型都好特別，其實唔一定要去睇迎客松，呢道松樹都好正啦










上到始信峰峰頂，突破一陣霧氣吹過來，周圍即刻變到朦朦朧朧，就好似係仙景一樣，唔怪得有人話黃山天氣變化好大，原本真係變得好快，呢兩日會感受好多次








離開始信峰繼續上路


呢棵松樹有名的，叫黑虎松，樹齡大約有 700 歲，咪即係明朝個時已經係道？可能以前既古人都曾經同我一樣企係黑虎松面前欣賞同一棵黑虎松，唔知再700年後有冇人又會有咁既諗法呢？




呢道可以睇到「夢筆生花」


「夢筆生花」係一枝毛筆型石峰峰頂上面，生出左好似花既松樹，]我覺得奇怪既唔係棵松點解可以生係石上面，而係有人竟然咁高技術可以係個頂起棚架


沿唔都有好多挑夫將山上要用既物資挑上山，我真係好衷心尊敬佢地，由山下唔坐纜車行上山都唔係人人可以做到，佢地仲要擔住幾十公斤既物資一步步由山腳行上來，冇佢地黃山上面都冇可能有咁好既設施同物資，而且佢地工作雖然超級辛苦，但人工其實係好低...呢份工作好值得我地尊敬




16人抬個櫃，見到都覺得重


路過北海賓館，轉去「猴子觀海」方向上山


都未到「猴子觀海」，已經見到猴子啦，個名改得好岩




呢道都有好靚既松樹


越上越高，景觀都越來越開揚，如果怕高既話望落去應該會好驚








遠望山下北海賓館，唔經唔覺原來已經上到好高


到左「猴子觀海」啦，見到未呢？


放大D


再放大D


如果加埋雲海既話，就真真正正係「猴子觀海」啦


由猴子觀海景區要行返轉頭，先返去白雲賓館，再行另一邊去今晚住既西海飯店




我地行得好慢，大約12點50分終於行到去西海飯店，先check in放低行李，咁就唔洗咩住咁多行李四圍行，西海飯店新翼真係好靚，呢間應該係黃山最新最靚既酒店


而我就訂左西海飯店床位，150一晚，所有床位都位於西海飯店舊翼部分




呢邊真係舊好多，有朋友二十多年前都已經係呢塊牌面前影相，今次又到我影




好舊式既設計，我感覺有小小鬼屋feel，唔驚既


多人間既床位，感覺又唔算太差既，係間房有小小味，但同行朋友覺得呢道太唔掂唔想住，要搬去第道住...呢道都ok啦唔係太差丫？今次要挨貴房啦





如果住床位既話，排雲樓同白雲賓館係靚好多

而我地就搬左去西海飯店新翼住，大堂整到超級靚




望返去舊翼個邊，可以話係一個天堂一個地獄


但1180一晚 ，真係好好好貴丫
唯有安慰下自己，諗返山上面可以有咁豪華既設施，都唔知用左幾多人力物力先可以做到，都算係合理啦？而且出面天氣咁凍但入面可以開住溫暖既暖氣，係好舒服




朋友仲係浴缸浸泡泡浴，好識享受


放低行李，休息一下，又再出去四圍行啦

↓ 紹興﹑西湖﹑太子灣公園 ↓ 
http://arho25.blogspot.hk/2013/09/blog-post_6.html

↓ 黃山 (下篇) ↓ 
http://arho25.blogspot.hk/2013/09/blog-post.html