2013年11月23日星期六

成都古鎮。洛帶古鎮

 < 成都﹑九寨溝﹑重慶12天遊 >

第二天

今日既目的地就係呢道啦


來到成都的第一個上午,天氣唔錯有個好開始,先係hostel對面既「鍾水餃」食早餐,呢間鍾水餃望落去好似好普通唔多顯眼,但人不可以貌相,睇落平平無奇 原來來頭唔細,「鍾水餃」係光緒時候已經創立,數返日子都有百幾年歷史,又拎左「中華老字號」﹑「中華名小吃」呢D稱號,比幾蚊就可以食到咁出名既老字號, 真係好
 

四川既野食真係好多油,第一日來到怕習慣,所以清淡D先
仲有當然要食抄手啦(抄手即係四川既雲吞),以前食過紅色抄手好正架,今日唔食住食普通既抄手先


一唔睇報紙一路歎美食,伯伯都好識享受


「鍾水餃」就係地鐵站出面,好方便;上年2011年去到成都時地鐵岩岩通車無耐只係得一條線,今年2012年已經有第二條線啦,不過去玩既話地鐵都仲係好多地方去唔到,多數都係要繼續坐巴士


成都好多地方都起緊地鐵,hostel對出都係一樣,以前行經出面既巴士全部唔見晒,咁就麻煩啦要慢慢搵個站出來,首先要搵巴士去新南門車站;一路行越行越遠,行左接近半個鐘終於搵到上車既地方,D巴士線改到好亂但好多地圖都冇update,只有靠自己四周圍留意下望下


新南門車站有去唔同地方既車,基本上所有四川諗到既地方呢就都可以去到


好彩今日人唔多,首先要買2日之後去九寨溝既車飛,九寨溝好多人去,唔預先買定既話就冇得去啦,成功買左7:45出發既車,¥147平過搭飛機好多,不過就要坐10個鐘先到,習慣坐長途車10個鐘唔算好長時間啦;坐車去九寨溝沿途可以欣賞到唔同既風景,所以都係坐車開心D


買完九寨溝車票之後就要諗下今日去邊好啦,既然已經來到車站就順便睇下有邊道好去先;見近近地不如就去洛帶古鎮,古鎮平時就去得多但四川既古鎮就未去過,就決定去睇睇啦


洛帶古鎮距離成唔係好遠,但部車係市區入面轉來轉去,坐左個幾鐘先到洛帶古鎮車站


出左車站其實仲未到古鎮,或者可以咁講跟本就唔知古鎮係邊,完全唔見有任何指示,只有一大堆三輪車等待水魚上釣!如果諗住開google map睇地圖既話就慘啦,google map上標示洛帶古鎮有錯誤,明明洛帶古鎮係汽車站南面,但地圖就顯示係汽車站既北面,好彩行左冇耐就發現呢個問題,都係問問當到人點去比較好;如果行岩路洛帶古鎮距離汽車站唔係好遠,慢行十分鐘就可以到達,由汽車站出來轉左轉右都可以,只要係分叉路轉向南行就可以去到真正既洛帶古鎮


去成都前都冇諗過去邊道邊道玩,機緣巧合之下來到洛帶古鎮呢個完全唔認識既地方,唔知有冇新奇好玩又有趣既野出現呢?


「洛帶古鎮有“天下客家第一鎮”的美譽,旅游資源十分豐富,文化底蘊非常厚重。洛帶景區主要包括洛帶古鎮核心保護區、金龍湖景區、寶勝原生態客家村三部分。鎮內千年老街、客家民居保存完好,老街呈“一街七巷子”格局,空間變化豐富;街道兩邊商舖林立,屬典型的明清建築風格。“一街”由上街和下街組成,寬約8米,長約1200米,東高西低,石板鑲嵌;街衢兩邊縱橫交錯著的“七巷”分別為北巷子、鳳儀巷、槐樹巷、江西會館巷、柴市巷、馬槽堰巷和糠市巷。」

如果唔講我都估唔到原來洛帶古鎮係一個客家古鎮,古鎮有「天下客家第一鎮」、「中國西部客家第一鎮」之稱,鎮上有2萬多客家人,佔全鎮人數9成,而且仲係講真正既廣東梅縣客家話;以前仲以為廣東呢邊先有客家人住,原來好耐以前清朝初年「湖廣填四川」事 件,好多廣東客家人已經千里迢迢搬到四川定居,將客家話客家文化帶入四川;以前返工既時候都接觸到好多講客家話既老人家,就咁聽落可能以為客家話同廣東話 有好大分別,但其實客家話廣東話都係由古漢語演變而成,兩者之間有好多相同既地方,如果慢慢了解一下客家話都唔難聽得明


洛帶古鎮既特色就係有條小河流過成個古鎮,沿流水向下行就可以去到古鎮另一邊出口,但點睇都覺得似坑渠多過似河






相比其他出名既古鎮,呢道唔算多人,因為冇咩旅行團會去呢道,更加唔會見到香港旅行團,可能呢道既特色唔及其他地方,又或者好多人會覺得呢道同其他古鎮都大同小異,不過呢道人少行起上來都舒服D,氣氛悠閒D;雖然話人唔多,話晒係距離成都最近既古鎮,人都唔係太少




好似中國其他古鎮一樣,每個古鎮都有呢D手信可以買,當然呢道唔例外


客家小食?唔知廣東既客家人有冇呢D小食既呢




就係因為以前有好多廣東人黎到呢道定居,所以有廣東會館既出現,比自己廣東人一個休閒、居住、做野既地方,更可以凝聚到一班同聲同氣既同鄉;洛帶除左有廣東會館,仲有湖南會館等等其他會館




廣東會館既建築都好有廣東特色,圓形耳仔形屋頂係廣東隨處可見,但係其他省份就好少有,係四川見到份外有親切感






好多廣東式建築


繼續行行左去出面一片空地,唔知點解無啦啦起個新土樓同一大堆新樓係道,完全係九唔搭八同古鎮完全唔夾,睇來又係想賺遊客錢既地方,心諗福建客家土樓同廣東 客家文化都唔同,除左用來賺錢都唔知佢想點;不過呢道都有一個值得去既地方,就係新既廁所,係古鎮入面好似真係唔見有公共廁所,有既都係一D要比¥1既私人廁所,而且質素就…我冇去所以唔知啦,但呢道個廁所點都好過出面D私人廁所小小(真係小小咋)




伯伯悠悠閒閒係道寫大字,正正就係四川悠閒既生活,好羨慕




E...呢道又有間傷心涼粉bor,頭先先見到有間阿婆涼粉,係咩黎既呢?


呢道仲有好多傷心涼粉,食完會傷心?


傷心涼粉係四川好出名,洛帶傷心涼粉就更出名,個名好似有D奇怪?點解食完會令人傷心既涼份都咁出名?原本我都唔係咁清楚,之前睇電視見到李純恩既介紹終於知道啦(好鐘意李純恩既節目,介紹好多當地特色野同文化,比起好多只係飲飲食食既旅遊節目like一萬倍),當中有兩個說法,第一:四川野食出名辣,而傷心涼粉都係一樣好辣好辣,所以就食到人好似喊咁流眼淚,其他人睇就以為你遇到D傷心事,所以就變成傷心涼粉;第二:當年好多廣東客家人來到四川,因為傷心 思念家鄉而做出呢個涼粉,所以就叫傷心涼粉;無論係邊個原因都好傷心涼粉都係洛帶古鎮既特色,街頭巷尾都可以見到傷心涼粉,去到一定要試試(我冇食到...cry...都唔知原來係咁出名,而且想試既時候又食得太飽冇試,希望有好心人話比我知係咩味道啦......)


好快就到左午餐時間,山長水遠去到四川就緊係要食四川菜啦,諗都唔洗諗叫個麻婆豆腐先,好耐都未食過正宗四川麻婆豆腐啦;呢個麻婆豆腐又唔係真係好辣,但就好麻好麻,食到成個口都麻晒,個名真係冇叫錯,人地叫麻婆豆腐又唔係辣婆豆腐當然係麻啦...總之就好正;四川既消費唔係好貴,平時係街食一碟麻婆豆腐只 係幾蚊,係呢D旅遊區食都係十幾蚊,物超所值


食飽繼續行,去到古鎮另一邊,有間好大既湖廣會館




有人帶住隻山羊行街,係放羊定想賣羊呢?




洛帶古鎮另一邊入口,門樓上刻有甑子場,我覺得有少少奇怪,門口係刻甑子場而唔係洛帶古鎮?而且我連「甑」字都係第一次見唔識讀...後來知道洛帶古鎮原名係甑子場,相傳三國時期劉禪係甑子場唔小心將玉帶趺左落井,從此甑子場就改名叫「落帶」,之後演變為「洛帶」


呢道有好多賣串燒既鋪頭,而且比起其他地方平好多,好多間都賣緊10蚊30串,有間仲10蚊32串,未見過有地方可以賣到咁平,但諗諗下都係覺得平得太過份,新聞都有講都唔知呢D係咩肉,都係唔為食Lu


傳說中「一根麵」,一根麵就係成碗麵裡面都只係有一條麵條,一條好好好長既麵條;見到¥10碗係四川黎講好似有少少貴,但睇佢拉麵都幾得意,好唔好食就唔知啦


古鎮唔係好大,主要就只係一條街,不過係道慢慢行下影下相食下野,唔經唔覺就過左幾個鐘,如果有時間去洛帶古鎮行下hea下都唔錯,冇時間就唔好專程去啦,相比其他大型古鎮呢道可能會令你失望








行完古鎮要去搭巴士返成都啦,如果過左時間冇車搭都唔知點算

返到新南門車站,又係因為起地鐵交通亂到七彩,慢慢沿路行去春熙路;春熙路可以話係成都最旺最多人既地方,食野買野全部都可以係呢道搵到


四川除左川菜出名,仲有咩出名呢?當然就係四川美女
網上好多攻略遊記都話春熙路多美女出沒,我都慕名而去,呢道真係男士們既天堂!完全係超出想像!非筆墨能夠形容!大家自己去探索一下啦!哈哈!!


春熙路「龍抄手」總店,呢間同「鍾水餃」一樣都係好出名既小食店,又係有「中華老字號」呢D稱號,而且更加出名人流更多,不過由上次去成都話想食,到今次都係冇食到,希望下次有機會食啦,唉...過門而不入


另一間四川特產「鄉村基」,成日都覺得佢好似KFC,心思思想試下但都係冇試


好快就行完街,迫巴士返hostel,呢個站真係好多人


巴士一到就成班人衝上車,好彩我唔急慢慢影完相都仲上到;係成都巴士上成日都見到一樣得意既事,好多人迫唔上前門都會係後門上車,而車上乘客都會好自動自覺幫手張八達通一個一個傳到車頭拍卡再傳返落去,呢種情況只係係成都見過,感覺上成都人比較老實,唔會貪少便宜,亦都會互相合作,而且公民意識好好,成都街頭好少見到好似其他地方咁滿街都垃圾


由朝行到晚,返到hostel好好享受一個豐富既晚餐,不過今次唔係四川菜,叫左個抄烏冬,食烏冬好似有少少奇怪,不過就可以襯返hostel既環境,仲要好好食架;我最鐘意呢間懶骨頭係因為呢道無論環境氣氛都令人好舒服,坐係道慢慢嘆真係好好既享受,而且D野食好平,同外面價錢差唔多,留係道慢慢食仲開心


食完烏冬,再一路食薯條一路上網,係呢道都唔知坐左幾耐


帶左新買既iPad,可以上下網查下資料,坐坐下原來已經好夜lu,又係時候休息啦,第二朝又可以去玩啦



2 則留言:

  1. 客家人去到係咪會同聲同氣好有親切感

    回覆刪除
    回覆
    1. 應該係啦,不過我唔係客家人唔知呢~

      刪除