台東。知本溫泉

< 台東﹑綠島﹑高雄5天遊 >

第四天（續）

台東除左海岸線靚之外，另一個吸引我既地方係溫泉，今次旅程最後一晚選擇左住係「知本溫泉」，享受悠閒溫泉樂趣



今晚住「知本金聯世紀酒店」，揀呢道因為佢係日式溫泉，即係好似日本咁唔洗著衫浸，台灣叫呢啲做「裸湯」；台灣大部份溫泉酒店都唔係呢種，而係興著衫浸溫泉，就好似水上樂園咁，不過我唔想戴泳帽浸囉...


呢間酒店都幾靚丫，價錢又唔貴，四人房大約1200港幣一晚，比日本溫泉酒店平唔少，而且房間算大又有露台（不過露台對住山好多蚊）




廁所都好大，有浴缸又有花灑位，浴缸啲水仲話係溫泉水tim


朋友訂左好多盒三文治拎返香港做手信，約係酒店交收，我都搭單訂左盒即場試食，四個人每人食兩件，留返兩件拎返屋企，早知買多盒返屋企慢慢食啦




酒店對出係「知本溪」，感覺好似日本啲溫泉區咁有條河經過，可以係河邊散散步




附近仲有小小既溫泉街，有餐廳有鋪頭有便利店，唔怕冇野食


酒店向河個邊風景一定靚好多；好快行一轉就趕返酒店，係時候浸溫泉啦！




溫泉係酒店頂樓，上到去有人係門口接待，會提供毛巾﹑locker，咩都唔洗帶就咁去都冇問題，仲有人帶去更衣室；更衣室好細不過應有既設備都有齊，係花灑只得三個，我地坐晒係道後面既人就要掛隊啦，溫泉就係相中咁，再加多個圓形池，三個都係露天環境好舒服，最重要係人唔多，最多個次都係得幾個人（張相係酒店網copy，唔係我影）


嘆完溫泉落左地下玩射箭，有美女做教練，哈哈


射完箭再去健身室玩，我地真係好得閒


玩完就去返溫泉街買野食，而家夜左反而多左人行，都唔少人黎知本浸溫泉bor


溫泉水出晒煙！




係便利店買野食返房慢慢嘆，間房咁舒服返去食仲開心，聽日會係下面食早餐


今晚就係食呢啲啦，比起日本familyMart台灣平好多，味道都唔錯，一定好食過香港便利店賣個啲


食完野休息一陣，又去浸多次溫泉，住得溫泉酒店最重要當然係浸溫泉啦！

第五天

訓醒後又去到天台享受多次溫泉，兩日浸三次好滿足，非常滿意呢個溫泉；嘆過溫泉後執好行李就落地下食早餐，難得一次食到自助早餐特別開心


早餐選擇好多，揀左好多鐘意既野食，足足拎左三次，又飽又滿足






好快夠鐘離開酒店，坐的士到知本火車站，小小既火車站外型都幾靚




今日天氣超好，藍天白雲，如果琴日都係咁好天就好啦




今次買唔到知本去高雄既車飛，買左遠啲既台東去高雄，冇問題可以順利上車，今次呢部車座位前有地方放行李，大家都坐得舒舒服服；坐左一陣車長突然行過黎同我地講野仲以為咩事，原來佢想請我地幫手同個外國人翻譯，好彩朋友英文勁可以幫到手，哈哈




一路睇下風景一路睇下書，時間過得好快好快，好快就離開呢個咁靚既東部美景






大約兩點返到高雄，距離返香港仲有小小時間，把握最後機會係高雄行行


由地鐵「凱旋站」出黎想行去「夢時代」，遠就唔係好遠不過天氣熱加上大家拎住所有行李，見到條大直路我諗大家都想暈低


夢時代係一個好大好大既商埸，冇時間行晒，當係黎涼冷氣啦




坐但嘆返個冬甩，話時話呢個可能係我人生食既第一個冬甩


行左陣商場，我地四個人要拆開兩pair，我班機早啲飛要同朋友兩個先行出發去機場，高雄機埸近市區好快就到


check in左行李仲有時間，落去便利店買野食，我一直都好想試下台灣日本便利店既關東煮，今次終於有機會食到啦，辣湯底夠晒辣好好味


又見面啦史迪仔




回程都係坐華航，班機唔滿，咁少人去高雄既？


今次有雞飯食，Yeah！


話咁快返到香港，五日台灣小旅程完滿結束，唔知幾時會再到台灣呢？落左機唔心急慢慢行，都估到啲寄倉行李冇咁快出黎，去到行李帶望一望果然比我估岩左，大大個紅色DELAY，都唔知等左幾耐先出到，近排香港機場好似冇次正常時間出到行李...


其實有朋友一早已經係接機大堂等緊我出黎，可惜等行李等咁耐，辛苦佢等；出到黎都未走住架，我地仲等埋另外兩位坐港龍返既朋友，大約遲我兩個鐘返到，最後今次旅程可以畫上一個完美句號，唔知幾時可以再一齊旅行呢？

< 台東﹑綠島﹑高雄5天遊 >

< 完 >